لندن :رپورٹ،سید عاصم علی قادری
بھارت کے مایہ ناز بلے باز ویرات کوہلی نے ایک اور تاریخی سنگِ میل عبور کرتے ہوئے ون ڈے انٹرنیشنل کرکٹ میں 15ہزار رنز مکمل کر لیے ہیں۔ وہ یہ اعزاز حاصل کرنے والے دنیا کے صرف دوسرے بلے باز بن گئے ہیں۔ ان سے قبل بھارت کے عظیم بلے باز سچن ٹنڈولکر 18,426 ون ڈے رنز کے ساتھ یہ مقام حاصل کر چکے ہیں۔ ویسٹ انڈیز کے خلاف پہلے ون ڈے میں کوہلی نے شاندار بیٹنگ کرتے ہوئے 88 گیندوں پر ناقابلِ شکست 139 رنز بنائے، جس میں 10 چوکے اور 9 چھکے شامل تھے۔ یہ ان کا ون ڈے کرکٹ میں 55واں سنچری اور بین الاقوامی کرکٹ میں 86واں سنچری تھا۔بھارت نے ویسٹ انڈیز کی جانب سے دیے گئے 296 رنز کے ہدف کو صرف 41.4 اوورز میں 2 وکٹوں کے نقصان پر حاصل کر لیا اور تین میچوں کی سیریز میں 1-0 کی برتری حاصل کر لی۔ کپتان شبمن گل نے بھی شاندار سنچری بناتے ہوئے 108 گیندوں پر 110 رنز بنائے اور کوہلی کے ساتھ دوسری وکٹ کے لیے 151 رنز کی شراکت قائم کی۔ ویسٹ انڈیز کی جانب سے جسٹن گریوز نے 108 گیندوں پر 101 رنز بنا کر اپنی پہلی ون ڈے سنچری مکمل کی، جبکہ جان کیمبل نے 62 رنز بنائے۔ دونوں نے پہلی وکٹ کے لیے 135 رنز کی شراکت قائم کی۔ تاہم بھارت کے اسپنر کلدیپ یادیو نے 40 رنز دے کر 4 وکٹیں حاصل کیں۔ ویسٹ انڈیز نے 50 اوورز میں 7 وکٹوں پر 295 رنز بنائے تھے۔ کوہلی نے 15 ہزار ون ڈے رنز کا سنگِ میل 303ویں اننگز میں حاصل کیا، جبکہ سچن ٹنڈولکر کو یہ اعزاز حاصل کرنے کے لیے 377 اننگز درکار ہوئی تھیں۔ یوں کوہلی اس تاریخی مجموعے تک پہنچنے والے تیز ترین بلے باز بھی بن گئے ہیں۔
