ٹیکنالوجی کی دنیا کی معروف کمپنی اینوڈیا کے چیف ایگزیکٹو جینسن ہوانگ کی عہدے سے دستبرداری کے بعد ان کے حوالے سے نئے انکشافات سامنے آئے ہیں۔ بلومبرگ کی ایک رپورٹ کے مطابق مبینہ ناجائز تعلقات کے الزامات اور کمپنی کے اندر ہونے والی تحقیقات کے دوران جینسن ہوانگ کا روایتی پراعتماد انداز بھی تبدیل ہوگیا تھا اور بالآخر 12 نومبر کو انہوں نے اپنے عہدے سے غیر مشروط طور پر علیحدگی اختیار کرلی۔
رپورٹ میں معاملے سے واقف ایک شخص کے حوالے سے بتایا گیا کہ استعفے کے وقت جینسن ہوانگ پہلے جیسے پراعتماد اور معاملات پر مکمل گرفت رکھنے والے دکھائی نہیں دے رہے تھے۔ ان کے رویے میں واضح تبدیلی آچکی تھی اور وہ گفتگو کے دوران ‘جو بھی ہو’ اور ‘مجھے کوئی پروا نہیں’ جیسے جملے استعمال کرنے لگے تھے۔
جینسن ہوانگ نے کئی دہائیوں کی محنت سے اینوڈیا کو مصنوعی ذہانت کے لیے جدید چپس تیار کرنے والی دنیا کی بڑی کمپنیوں میں شامل کیا تھا۔ وہ اپنی باریک بینی اور کمپنی کے معاملات میں براہ راست دلچسپی لینے کے لیے مشہور تھے۔ چپس کے ڈیزائن سے لے کر جونیئر ملازمین کی تنخواہوں تک مختلف امور پر ان کی گہری نظر رہتی تھی۔
تاہم، حالیہ اسکینڈل کے دوران ان کے قریبی ساتھیوں کے مطابق ان کا اعتماد متاثر ہوا اور وہ خود کو قصوروار ٹھہرانے لگے۔ رپورٹ میں بتایا گیا کہ انہوں نے اپنے لیے انتہائی سخت الفاظ بھی استعمال کیے۔
مبینہ تعلقات کا اسکینڈل اور تحقیقات
بلومبرگ کی رپورٹ کے مطابق اکتوبر کے آخری دنوں میں جینسن ہوانگ کے ایک ایسی خاتون کے ساتھ قریبی تعلقات کی خبریں سامنے آئیں جن پر چینی جاسوس ہونے کا شبہ ظاہر کیا گیا تھا۔ اس خاتون کا نام ایلس ہوانگ بتایا گیا۔
ابتدائی طور پر ایسا محسوس ہوتا تھا کہ جینسن ہوانگ اس تنازع سے نکلنے میں کامیاب ہوجائیں گے، کیونکہ اینوڈیا کے بورڈ آف ڈائریکٹرز میں شامل بیشتر افراد ان کے پرانے سرمایہ کار، کاروباری شراکت دار اور دوست تھے۔ اسی وجہ سے بورڈ ان خبروں پر فوری کارروائی یا عوامی سطح پر تبصرہ کرنے سے گریز کرتا رہا۔
رپورٹ کے مطابق جینسن ہوانگ نے ابتدا میں اپنے دوستوں اور ساتھیوں کو بتایا تھا کہ انہوں نے اپنی اہلیہ سے بے وفائی نہیں کی۔ 2025 کے اواخر سے کمپنی کے اندر بھی جب ان سے اس معاملے پر سوالات کیے گئے تو وہ الزامات کی تردید کرتے رہے۔
اپنے آخری انٹرویوز میں سے ایک کے دوران انہوں نے بلومبرگ کو بتایا تھا کہ ایلس ہوانگ کے ساتھ ان کے تعلقات بھی عام چینی صارفین اور کاروباری عہدیداروں کے ساتھ تعلقات جیسے ہی تھے۔
تاہم 6 نومبر کو فنانشل ٹائمز کی ایک رپورٹ میں امریکی حکام کے حوالے سے دعویٰ کیا گیا کہ دونوں کے درمیان تعلقات محض کاروباری نوعیت کے نہیں بلکہ رومانوی تھے۔
اس انکشاف کے بعد اینوڈیا کے جنرل کونسل اور قانونی امور کے سربراہ ٹم ٹیٹر جینسن ہوانگ سے براہ راست ملاقات کے لیے ان کے گھر پہنچے۔ رپورٹ کے مطابق اس ملاقات میں ہوانگ نے اپنے تعلقات کا اعتراف کرلیا۔
اس کے بعد بورڈ کے سیکریٹری ٹم ٹیٹر نے ڈائریکٹرز کو بتایا کہ معاملے پر مزید خاموشی اختیار کرنا مناسب نہیں اور کارروائی ضروری ہے۔ بورڈ نے الزامات کی تحقیقات کا اعلان کیا اور اس مقصد کے لیے ایک معروف قانونی فرم کی خدمات حاصل کرنے کا فیصلہ کیا۔
8 نومبر کو جینسن ہوانگ نے کمپنی کے تمام ملازمین کو ایک ای میل بھیجی، جس میں انہوں نے ناجائز تعلقات کا اعتراف کیا، اپنے خاندان سے معافی مانگی اور بورڈ کی تحقیقات میں مکمل تعاون کی یقین دہانی کرائی۔
کمپنی کے معاملات پر توجہ متاثر ہونے لگی
اسکینڈل سامنے آنے کے بعد ایسے شواہد بھی رپورٹ کیے گئے جن سے ظاہر ہوتا تھا کہ جینسن ہوانگ کی توجہ کمپنی کے انتظامی امور سے ہٹ رہی تھی۔
اینوڈیا کا انتظامی ڈھانچہ دیگر بڑی کمپنیوں سے مختلف تھا۔ تقریباً 60 اعلیٰ عہدیدار براہ راست جینسن ہوانگ کو رپورٹ کرتے تھے، جو ایک غیر معمولی طور پر بڑی ٹیم تھی۔
کمپنی کے تمام ملازمین کو اپنی پانچ اہم ترین ترجیحات پر مشتمل ای میل جمع کروانا ہوتی تھی۔ جینسن ہوانگ ان ای میلز کے ذریعے ملازمین کی کارکردگی اور ترجیحات کا جائزہ لیتے تھے۔
وہ عام طور پر دن یا رات کسی بھی وقت ان پیغامات کا فوری جواب دیتے تھے، تاہم حالیہ دنوں میں ان کے جوابات میں تاخیر ہونے لگی تھی۔
11 نومبر کو نیویارک ٹائمز نے اپنی رپورٹ میں دعویٰ کیا کہ جینسن ہوانگ کے اینوڈیا کی ہیلتھ کیئر ڈویژن کی نائب صدر کمبرلی پاؤل کے ساتھ بھی شادی سے باہر رومانوی تعلقات تھے۔
اس نئی رپورٹ کے بعد بورڈ نے تیزی سے کارروائی کی۔ 11 نومبر کو ڈائریکٹرز کا آن لائن اجلاس منعقد ہوا جو رات گئے تک جاری رہا۔ بالآخر جینسن ہوانگ کے پاس استعفیٰ دینے کے سوا کوئی راستہ باقی نہ رہا۔
کولیٹ کریس عبوری چیف ایگزیکٹو مقرر
12 نومبر کو اینوڈیا کے بورڈ نے اعلان کیا کہ کمپنی کی چیف فنانشل آفیسر کولیٹ کریس عبوری چیف ایگزیکٹو کی ذمہ داریاں سنبھالیں گی۔
انہوں نے فوری طور پر ملازمین کو اعتماد میں لینے کی کوشش کی اور 18 نومبر کو کمپنی کے تمام ملازمین کے ساتھ خصوصی اجلاس منعقد کرنے کا وعدہ کیا۔
دوسری جانب بورڈ کے سامنے اب سب سے اہم چیلنج جینسن ہوانگ کا مستقل متبادل تلاش کرنا ہے۔
ممکنہ امیدواروں میں ایڈوانسڈ مائیکرو ڈیوائسز (اے ایم ڈی) کی چیف ایگزیکٹو لیزا سو اور آرم ہولڈنگز کے سربراہ رینے ہاس کے نام بھی زیر غور بتائے گئے ہیں۔
رپورٹ کے مطابق جینسن ہوانگ کا متبادل تلاش کرنا اس لیے بھی مشکل ہوگا کہ وہ بیک وقت ٹیکنالوجی کے ماہر، اعلیٰ منتظم، مارکیٹنگ کے ماہر، حکومتی حلقوں میں اثرورسوخ رکھنے والے نمائندے اور کمپنی کا عوامی چہرہ تھے۔
اینوڈیا نے روایتی انداز میں جانشینی کا کوئی باقاعدہ منصوبہ بھی تیار نہیں کیا تھا، جس کے باعث ان کی علیحدگی کے بعد کمپنی کو انتظامی تبدیلیوں کے حوالے سے نئے چیلنجز کا سامنا ہے۔
امریکی کانگریس میں پیشی کا امکان
جینسن ہوانگ کی مشکلات عہدہ چھوڑنے کے بعد بھی ختم ہوتی دکھائی نہیں دے رہیں۔ رپورٹ کے مطابق آنے والے ہفتوں میں انہیں امریکی کانگریس کے سامنے پیش ہوکر بیان دینا پڑ سکتا ہے۔
امریکی سیاست دان ان سے ایلس ہوانگ کے ساتھ مبینہ تعلقات اور اس معاملے کے اینوڈیا کی جدید ترین چپس سے متعلق حساس معلومات پر ممکنہ اثرات کے بارے میں سوالات کرسکتے ہیں۔
حالیہ دنوں میں جینسن ہوانگ سے بات کرنے والے افراد کے مطابق انہوں نے کہا کہ اب انہیں اس بات کی زیادہ پروا نہیں کہ ان کے ساتھ کیا ہوتا ہے۔ ان کی سب سے بڑی تشویش اپنی اہلیہ کے حوالے سے ہے۔
انہوں نے یہ بھی کہا کہ وہ نہیں چاہتے کہ اس اسکینڈل سے منسلک خواتین کی زندگیاں بھی متاثر ہوں۔
یوں چند ہفتے قبل مصنوعی ذہانت کی عالمی صنعت کا نمایاں ترین چہرہ سمجھے جانے والے جینسن ہوانگ کی اینوڈیا سے علیحدگی نے ٹیکنالوجی کی دنیا میں ایک بڑی انتظامی تبدیلی کی صورتحال پیدا کردی ہے۔
