امریکی ریاست کنساس کے شہر وچیٹا میں ایک سنسنی خیز اور دردناک واقعہ پیش آیا ہے جہاں بچوں کے فٹبال میچ کے دوران ایک خاتون کی پک اَپ ٹرک اچانک کھیل کے میدان میں گھس گئی۔ اس المناک حادثے کے نتیجے میں ایک 6 سالہ بچہ اور 35 سالہ شخص ہلاک ہو گئے، جبکہ 11 افراد شدید زخمی ہوئے۔
مقامی پولیس کے مطابق یہ واقعہ معروف اسٹرائیکر اسپورٹس کمپلیکس میں پیش آیا۔ حادثے کے وقت گاڑی چلانے والی 34 سالہ خاتون ڈرائیور کی گاڑی میں ان کے اپنے دو کم عمر بچے بھی سوار تھے۔ پولیس نے موقع پر پہنچ کر خاتون ڈرائیور کو حراست میں لے لیا ہے۔ پولیس حکام کا کہنا ہے کہ خاتون تفتیش میں مکمل تعاون کر رہی ہیں، تاہم ابھی تک اس بات کا تعین نہیں ہو سکا کہ گاڑی کھیل کے میدان میں حادثاتی طور پر داخل ہوئی یا یہ اقدام قصداً کیا گیا تھا۔
حادثے میں زخمی ہونے والوں میں 5 سے 9 سال کی عمر کے 5 بچے بھی شامل ہیں۔ طبی حکام اور پولیس کے مطابق اگرچہ کچھ زخمیوں کی حالت تشویشناک تھی، لیکن فوری طور پر کسی کی حالت کو جان لیوا قرار نہیں دیا گیا۔
واقعے کے فوراً بعد اسپورٹس کمپلیکس میں ہونے والی دیگر تمام کھیلوں کی سرگرمیوں کو منسوخ کر دیا گیا۔ پولیس نے واقعے کی جامع تحقیقات شروع کر دی ہیں اور وہاں موجود عینی شاہدین سے درخواست کی ہے کہ وہ حادثے کی کوئی بھی ویڈیو یا تصویری ثبوت تفتیشی ٹیموں کو فراہم کریں۔
