بیجنگ: چین کے وزیر خارجہ وانگ یی نے ایرانی ہم منصب عباس عراقچی سے ملاقات کے دوران ایران کے جائز حقوق اور مفادات کے تحفظ کیلئے بیجنگ کے تعاون کو جاری رکھنے کا اعلان کیا ہے۔
چینی وزارت خارجہ کے مطابق وانگ یی نے بدھ کو بیجنگ میں عباس عراقچی سے ملاقات کی، جس میں دونوں ممالک کے درمیان بات چیت اور تعاون مزید مضبوط بنانے پر گفتگو ہوئی۔
وانگ یی نے کہا کہ چین ایران کے جائز حقوق اور مفادات کے تحفظ کیلئے تعاون جاری رکھے گا۔ انہوں نے امریکا اور ایران پر بھی زور دیا کہ موجودہ تنازع کے دوران تحمل اور دانش مندی کا مظاہرہ کیا جائے۔
چینی وزیر خارجہ نے آبنائے ہرمز کو جلد از جلد دوبارہ کھولنے پر بھی زور دیا۔ ان کا کہنا تھا کہ تمام متعلقہ فریق ایسے مؤثر اقدامات کریں جن سے اس اہم بحری گزرگاہ پر معمول کی آمدورفت بحال ہوسکے۔
وانگ یی نے امریکا اور ایران پر اسلام آباد مفاہمتی یادداشت کی طرف واپس آنے اور باہمی تشویش کے معاملات پر بامعنی مذاکرات کرنے پر بھی زور دیا۔
چین نے خطے میں جاری کشیدگی کے مزید یمن اور بحیرہ احمر تک پھیلنے کے خدشے پر بھی تشویش کا اظہار کیا۔
چین اس سے قبل بھی امریکا اور ایران کے درمیان مذاکرات کی بحالی اور کشیدگی کم کرنے کی حمایت کرچکا ہے۔ بیجنگ نے پاکستان سمیت دیگر ممالک کی سفارتی کوششوں کی بھی حمایت کا اظہار کیا ہے۔
یہ ملاقات ایسے وقت میں ہوئی ہے جب آبنائے ہرمز میں بحری آمدورفت انتہائی محدود ہے۔ فراہم کردہ اعداد و شمار کے مطابق منگل کو صرف چار بحری جہاز آبنائے ہرمز سے گزرے، جبکہ جنگ سے قبل عالمی تیل اور ایل این جی کی تقریباً پانچواں حصہ سپلائی اسی راستے سے گزرتی تھی۔
