ایشین گیمز 2026 کا آغاز 19 ستمبر سے جاپان میں ہوگا

لندن:رپورٹ، سید عا صم علی قادری
ایشیا ء کے کھیلوں کے سب سے بڑے میلے 20ویں ایشین گیمز ایچی-ناگویا 2026 کے مقابلے 19ستمبر سے 4اکتوبر 2026تک جاری رہیں گے۔ ایشین گیمز کے منتظمین اور اولمپک کونسل آف ایشیا کے مطابق اس ایڈیشن میں ایشیا ء کے 45ممالک اور خطے شریک ہوں گے۔ ایشین گیمز کو ایشیا کا سب سے بڑا کثیر کھیلوں کا مقابلہ قرار دیا جاتا ہے۔ ۔ پہلا ایشین گیمز 1951 میں نئی دہلی، بھارت میں منعقد ہوا تھا۔ اس وقت ایشیا کے صرف 11 ممالک نے شرکت کی تھی، ایشین گیمز عام طور پر ہر چار سال بعد منعقد ہوتے ہیں۔ جاپان اس سے قبل بھی ایشین گیمز کی میزبانی کر چکا ہے، تاہم ایچی-ناگویا 2026 اس لحاظ سے خاص اہمیت رکھتا ہے کہ جاپان ایک مرتبہ پھر ایشیا کے بہترین ایتھلیٹس کی میزبانی کر رہا ہے۔ موجودہ ایڈیشن کو باضابطہ طور پر 20ویں ایشین گیمز کا درجہ دیا گیا ہے۔ ایشین گیمز کی حالیہ تاریخ پر نظر ڈالی جائے تو چین سب سے طاقتور ملک کے طور پر سامنے آتا ہے۔ چین نے 1982 سے مسلسل ہر ایشین گیمز کے مجموعی میڈل ٹیبل میں پہلی پوزیشن حاصل کی ہے۔ آخری ایشین گیمز، جو 2023 میں چین کے شہر ہانگژو میں منعقد ہوئے، وہاں بھی چین نے واضح برتری کے ساتھ پہلی پوزیشن حاصل کی تھی۔ہانگژو میں چین نے 201 طلائی، 111 چاندی اور 71 کانسی، مجموعی طور پر 383 تمغے حاصل کیے تھے۔ جاپان دوسرے اور جنوبی کوریا تیسرے نمبر پر رہے۔ اب 2026 میں چین کے سامنے اپنی اس طویل حکمرانی کو برقرار رکھنے کا چیلنج ہے، جبکہ میزبان جاپان، جنوبی کوریا، بھارت، ایران، قازقستان، ازبکستان اور دیگر مضبوط ایشیائی ممالک بھی زیادہ سے زیادہ تمغے حاصل کرنے کی کوشش کریں گے۔43 کھیل، 469 میڈل مقابلیایچی-ناگویا ایشین گیمز 2026 میں کھیلوں کا پروگرام انتہائی وسیع رکھا گیا ہے۔ سرکاری پروگرام کے مطابق 43 کھیلوں، 71 ڈسپلن اور 469 میڈل ایونٹس میں مقابلے ہوں گے۔ ان کھیلوں میں ایتھلیٹکس، تیراکی، آرچری، بیڈمنٹن، بیس بال، باسکٹ بال، باکسنگ، بریکنگ، کینوئنگ، سائیکلنگ، گھڑ سواری، فینسنگ، فٹبال، گالف، جمناسٹکس، ہینڈبال، ہاکی، جوڈو، کبڈی، کراٹے، روئنگ، رگبی، سیلنگ، شوٹنگ، اسکواش، ٹیبل ٹینس، تائیکوانڈو، ٹینس، ٹرائیتھلون، والی بال، ویٹ لفٹنگ، ریسلنگ، ووشو اور دیگر کھیل شامل ہیں۔ایشین گیمز کی خاص کشش یہ بھی ہے کہ یہاں اولمپک کھیلوں کے ساتھ کئی ایسے روایتی ایشیائی کھیل بھی شامل ہوتے ہیں جو اولمپکس میں موجود نہیں ہوتے۔ کبڈی، سیپاک تکرا، ووشو اور کرکٹ ان میں خاص طور پر قابل ذکر ہیں۔2026 کے ایشین گیمز میں ٹی20 کرکٹ بھی شامل ہے،۔ پاکستان، بھارت، سری لنکا اور بنگلہ دیش جیسے ممالک کی شرکت کرکٹ مقابلوں کو انتہائی اہم بنا دیتی ہے۔ ایشین گیمز میں کرکٹ کی موجودگی پاکستان اور بھارت کے شائقین کے لیے بھی خاص کشش رکھتی ہے کیونکہ دونوں ممالک کے درمیان مقابلہ ہمیشہ ہی عالمی سطح پر غیر معمولی توجہ حاصل کرتا ہے۔نئے دور کے کھیلوں کو بھی ایشین گیمز میں نمایاں جگہ دی گئی ہے۔ ای اسپورٹس نوجوان نسل کی بڑھتی ہوئی دلچسپی کے باعث اہم حصہ بن چکا ہے۔ اس سے ایشین گیمز کا دائرہ روایتی کھیلوں سے نکل کر جدید ڈیجیٹل مقابلوں تک بھی پہنچ گیا ہے۔ پاکستان کی ایشین گیمز کی تاریخ میں سب سے نمایاں کامیابیاں خصوصا ہاکی میں رہی ہیں۔ اس کے علاوہ پاکستان نے اسکواش، کشتی، باکسنگ، کبڈی، ایتھلیٹکس اور دیگر کھیلوں میں بھی ایشین سطح پر تمغے حاصل کیے ہیں۔ہانگژو 2023 میں پاکستان نے ایک چاندی اور دو کانسی کے تمغے حاصل کیے تھے۔ ایچی-ناگویا 2026 میں 45 قومی اولمپک کمیٹیاں/ممالک اور خطے حصہ لے رہے ہیں۔ ان میں چین، جاپان، جنوبی کوریا، بھارت، پاکستان، ایران، قازقستان، ازبکستان، افغانستان، بنگلہ دیش، سری لنکا، نیپال، ملائیشیا، انڈونیشیا، تھائی لینڈ، فلپائن، سنگاپور، قطر، سعودی عرب، متحدہ عرب امارات اور دیگر ممالک شامل ہیں۔ ۔ ناگویا اور ایچی پریفیکچر اس پورے کھیلوں کے میلے کا مرکزی مرکز ہوں گے۔ایشین گیمز 2026 کی افتتاحی تقریب 19 ستمبر کو ہوگی جبکہ اختتامی تقریب 4 اکتوبر کو منعقد کی جائے گی۔ اولمپک کونسل آف ایشیا ء نے بھی 2026 کو ایشین گیمز کا اہم سال قرار دیتے ہوئے ایچی-ناگویا کو 20ویں ایشین گیمز کے میزبان کے طور پر درج کیا ہے۔ پاکستان سمیت دیگر ایشیائی ممالک اپنی بہترین کارکردگی کے ذریعے زیادہ سے زیادہ تمغے حاصل کرنے کے لیے میدان میں اتریں گے۔19 ستمبر سے جاپان میں شروع ہونے والا یہ کھیلوں کا میلہ نہ صرف ایشیا کے بہترین کھلاڑیوں کے درمیان مقابلے کا مرکز ہوگا بلکہ پاکستان سمیت دنیا بھر میں موجود ایشیائی کھیلوں کے شائقین کی توجہ کا بھی مرکز بنے گا۔