عمران خان اور بشری بی بی کو مجموعی طور پر 17،17سال قید کی سزا

بانی پی ٹی آئی عمران خان اور بشری بی بی کے خلاف توشہ خانہ ٹو کیس کا فیصلہ سنا دیا گیا ہے، جس میں دونوں کو 10، 10 سال قید کی سزا سنائی گئی ہے۔تفصیلات کے مطابق عمران خان اور بشری بی بی کو دفعہ 409 کے تحت 10، 10 سال اور دفعات 5، 2، 47 کے تحت 7، 7 سال قید کی سزا سنائی گئی۔ مجموعی طور پر دونوں کو فی کس 17 سال کی سزا سنائی گئی ہے، جبکہ بانی پی ٹی آئی اور بشری بی بی کی مجموعی سزا 34 سال بنتی ہے۔ بانی پی ٹی آئی اور بشری بی بی کو ایک کروڑ 64 لاکھ 500 روپے فی کس جرمانہ بھی ادا کرنا ہوگا۔پاکستان تحریک انصاف کے بانی اور بشری بی بی کے خلاف توشہ خانہ ٹو کیس کی سماعت آج اڈیالہ جیل میں ہوئی، جہاں اسپیشل جج سینٹرل شاہ رخ ارجمند نے کیس کا فیصلہ سنایا۔ واضح رہے کہ توشہ خانہ ٹو کیس کی آخری سماعت 16 اکتوبر کو اڈیالہ جیل میں ہوئی تھی، جس کے بعد تین بار سماعت ملتوی ہوئی۔13 جولائی 2024 کو نیب نے توشہ خانہ ٹو کیس میں بانی پی ٹی آئی اور بشری بی بی کی اڈیالہ جیل می گرفتاری ڈالی تھی۔بانی پی ٹی آئی اور بشری بی بی 37 دن تک اڈیالہ جیل میں نیب کی تحویل میں رہے اور تفتیش مکمل ہونے کے بعد نیب نے 20 اگست کو احتساب عدالت میں توشہ خانہ ٹو کیس کا ریفرنس دائر کیا تھا۔