امریکی صدر ڈونلڈ ٹرمپ نے اسرائیلی پارلیمانی انتخابات میں سابق وزیرِ اعظم بنیامین نیتن یاہو کی توقعات سے بہتر کارکردگی کا کریڈٹ لیتے ہوئے دعویٰ کیا ہے کہ ان کی حمایت کے باعث نیتن یاہو شکست سے نکل کر مضبوط پوزیشن میں آئے ہیں۔
سوشل میڈیا پلیٹ فارم ‘ٹروتھ سوشل’ پر جاری ایک پیغام میں ڈونلڈ ٹرمپ نے لکھا کہ نیتن یاہو نے توقعات سے کہیں زیادہ شاندار کارکردگی دکھائی ہے اور وہ یا تو جیت رہے ہیں یا مقابلہ برابر ہے۔ انہوں نے مزید کہا کہ انتخابی سروے پہلے ان کی شکست کی پیشگوئی کر رہے تھے لیکن ان کی تائید نے انتخابی صورتحال کو مکمل طور پر بدل دیا۔
اسرائیل کی مرکزی الیکشن کمیٹی کے مطابق اب تک 41 فیصد ووٹوں کی گنتی مکمل ہو چکی ہے۔ ان ابتدائی سرکاری نتائج کے تحت نیتن یاہو کی جماعت ‘لیکود’ 28 نشستیں حاصل کرتی دکھائی دے رہی ہے، جبکہ سابق آرمی چیف گادی آئزنکوت کے اپوزیشن اتحاد ‘یشار’ کو 21 نشستیں ملنے کا امکان ہے۔
مجموعی طور پر نیتن یاہو کا دائیں بازو کا مذہبی اتحاد 57 نشستوں پر آگے ہے، جبکہ ‘پرو چینج’ اتحاد 47 اور عرب جماعتوں کا بلاک 16 نشستوں پر برتری حاصل کیے ہوئے ہے۔ اسرائیلی پارلیمنٹ ‘کنیست’ کی کل 120 نشستوں میں سے حکومت سازی کیلئے 61 اراکین کی حمایت لازمی ہے، اور فی الحال نیتن یاہو اتحاد اکثریت کے ہندسے سے 4 نشستیں دور ہے۔ ووٹوں کی مکمل گنتی کے بعد ہی حتمی صورتحال واضح ہو سکے گی۔
