سندھ فلمز اور جیو فلمز کی مشترکہ پیشکش اینتھالوجی فلم ’شیروز‘ کی پروموشن کے سلسلے میں گفتگو کرتے ہوئے معروف اداکارہ زارا نور عباس نے دلچسپ انکشافات کیے ہیں۔ سات برس کے طویل عرصے کے بعد بڑے پردے پر واپسی کرنے والی زارا نور عباس فلم کے ایک حصے ’گیئر اپ‘ میں مرکزی کردار ادا کر رہی ہیں، جس کی ہدایت کاری کے فرائض ثاقب خان نے انجام دیے ہیں۔
جیو ڈیجیٹل کو دیے گئے ایک خصوصی انٹرویو میں زارا نور نے بتایا کہ وہ فلم میں ‘سائرہ’ نامی بم ڈسپوزل اسکواڈ کی ایک ایسی افسر کا کردار نبھا رہی ہیں، جسے عورت ہونے کی وجہ سے اپنی صلاحیتیں ثابت کرنے کے لیے سخت جدوجہد کرنا پڑتی ہے۔ ان کا کہنا تھا کہ فلم میں وہ نہ صرف ایک بم کو ناکارہ بناتی ہیں بلکہ معاشرتی تعصبات کا مقابلہ کرتے ہوئے خود کو بہترین افسر کے طور پر ثابت بھی کرتی ہیں۔
ایک سوال کے جواب میں کہ اگر انہیں ایک دن کے لیے پولیس افسر کا عہدہ ملے تو وہ کیا کریں گی؟ اداکارہ کا کہنا تھا کہ وہ خواتین اور بچوں سے زیادتی کے تمام کیسز کے مجرموں کو بلا تاخیر پھانسی پر لٹکا دیں گی اور اس معاملے میں وہ قانون کی باریکیوں کو بالکل نہیں دیکھیں گی۔ مزید برآں، ایک ظریفانہ سوال کے جواب میں انہوں نے کہا کہ وہ اپنے شوہر اسد صدیقی کو گرفتار کریں گی جبکہ تفتیشی کمرے میں اداکار فہد مصطفیٰ کو بٹھانا پسند کریں گی۔ واضح رہے کہ فلم ’شیروز‘ 2 اکتوبر کو ملک بھر کے سینما گھروں میں نمائش کے لیے پیش کی جائے گی، جس میں زارا نور کے علاوہ اشنا شاہ اور کنزہ ہاشمی بھی بنیادی کردار ادا کر رہی ہیں۔
