دنیا کے معروف فٹبالر لیونل میسی ایک بار پھر ارجنٹینا کی قومی ٹیم کی جرسی میں میدان میں نظر آئیں گے، جہاں انہیں شاندار بین الاقوامی کیریئر کے بعد باقاعدہ الوداع دیا جائے گا۔
ارجنٹائن فٹبال ایسوسی ایشن نے تصدیق کی ہے کہ 39 سالہ لیونل میسی 6 اکتوبر کو بیونس آئرس کے مونومینٹل اسٹیڈیم میں بینن کے خلاف ارجنٹینا کی جانب سے آخری میچ کھیلیں گے۔
اے ایف اے کے صدر کلاڈیو تاپیا کے مطابق کوچ لیونل اسکالونی سے مشاورت کے بعد میسی کو مداحوں کے سامنے الوداعی مقابلے میں شرکت کی دعوت دی گئی، جسے اسٹار فٹبالر نے قبول کرلیا۔
میسی اب تک ارجنٹینا کے لیے 207 میچز کھیل چکے ہیں، جن میں انہوں نے 125 گول اسکور کیے۔ انہوں نے 2022 کے ورلڈ کپ میں ارجنٹینا کی کامیابی میں بھی اہم کردار ادا کیا تھا۔
میسی کے بین الاقوامی کیریئر کے آخری مرحلے میں باقاعدہ الوداعی تقریب نہیں ہو سکی تھی، تاہم اب انہیں اپنے ہوم گراؤنڈ پر مداحوں کے سامنے آخری بار کھیلنے کا موقع ملے گا۔
2022 کی ورلڈ کپ فاتح ارجنٹینا ٹیم کے کھلاڑیوں اور ان کے اہل خانہ کو بھی اس تقریب میں مدعو کیا جائے گا۔
یوں میسی کی قومی ٹیم میں یہ واپسی ان کے بین الاقوامی کیریئر کو باقاعدہ الوداع دینے کے لیے منعقد ہونے والے خصوصی مقابلے کے طور پر سامنے آئے گی۔
