پاکستان کوئز سوسائٹی کا یوکے پارلیمنٹ ویک پر عالمی کوئز مقابلے کا اعلان

لندن : رپورٹ سید عاصم علی قادری

یوکے پارلیمنٹ ویک 2026 کے موقع پر پاکستان کوئز سوسائٹی انٹرنیشنل (رجسٹرڈ) کی جانب سے برطانوی پارلیمنٹ کی تاریخ، جمہوری روایات، پارلیمانی نظام، اہم شخصیات اور برطانیہ کے سیاسی و آئینی ارتقا سے متعلق ایک خصوصی بین الاقوامی کوئز مقابلے کے انعقاد کا اعلان کیا گیا ہے۔ یہ مقابلہ 26 نومبر سے 29 نومبر 2026 تک جاری رہے گا، جس میں دنیا بھر سے کوئز کے شائقین اور مختلف شعبہ ہائے زندگی سے تعلق رکھنے والے افراد شرکت کر سکیں گے۔پاکستان کوئز سوسائٹی انٹرنیشنل (رجسٹرڈ) کے زیر اہتمام منعقد ہونے والے اس خصوصی مقابلے کا مقصد برطانوی پارلیمنٹ کی تاریخ، اس کے نظامِ کار، جمہوری اقدار اور پارلیمانی روایات کے بارے میں عوامی سطح پر معلومات اور شعور کو فروغ دینا ہے۔ اس سلسلے میں برطانوی پارلیمنٹ کے حوالے سے معلوماتی سوالات اور ان کے جوابات پر مشتمل خصوصی کوئز ترتیب دیا گیا ہے، جس میں شرکاء کی معلومات اور علمی صلاحیتوں کو جانچنے کا موقع فراہم کیا جائے گا۔اس مقابلے کی ایک نمایاں خصوصیت یہ ہے کہ اس میں شرکت کے لیے کسی قسم کی رجسٹریشن یا مقابلے کی فیس مقرر نہیں کی گئی۔ اسی طرح امیدواروں کے لیے عمر، تعلیمی قابلیت یا کسی مخصوص پیشہ ورانہ شعبے سے تعلق رکھنے کی بھی کوئی شرط نہیں رکھی گئی۔ یہ مقابلہ ہر شخص کے لیے کھلا ہے اور دنیا کے کسی بھی ملک میں رہنے والا فرد اس میں حصہ لے سکتا ہے۔منتظمین کے مطابق اس عالمی کوئز مقابلے میں پاکستانیوں کے علاوہ برطانوی شہری، برٹش پاکستانی، یورپی ممالک کے باشندے اور دنیا کے دیگر ممالک سے تعلق رکھنے والے افراد بھی شرکت کے اہل ہوں گے۔ مذہب، قومیت، زبان یا رنگ و نسل کی کوئی پابندی نہیں ہوگی۔ مسلمان اور غیر مسلم، مرد و خواتین، طلبہ، اساتذہ، صحافی، دانشور، ملازمت پیشہ افراد اور زندگی کے مختلف شعبوں سے وابستہ تمام دلچسپی رکھنے والے افراد اس علمی سرگرمی میں حصہ لے سکتے ہیں۔مقابلے کا انعقاد دو مختلف طریقوں سے کیا جائے گا۔ دنیا بھر کے شرکاء کے لیے آن لائن کوئز مقابلہ منعقد ہوگا، تاکہ مختلف ممالک میں مقیم افراد اپنے گھروں سے ہی اس سرگرمی میں شریک ہو سکیں۔ اس کے علاوہ برطانیہ کے دارالحکومت لندن میں مقیم کوئز کے شائقین اور دلچسپی رکھنے والے افراد کے لیے بالمشافہ (فزیکل) کوئز مقابلے کا بھی اہتمام کیا جائے گا۔مقابلے میں نمایاں کارکردگی کا مظاہرہ کرنے والے کامیاب شرکاء اور پوزیشن حاصل کرنے والوں کو ان کی کامیابی کے اعتراف میں میڈلز، سرٹیفکیٹس اور دیگر انعامات سے نوازا جائے گا۔اس بین الاقوامی کوئز مقابلے کے حوالے سے ایک اور اہم پیش رفت یہ ہے کہ انٹرنیشنل کوئزنگ ایسوسی ایشن (International Quizzing Association)، برطانیہ کی ڈائریکٹر محترمہ جین (Madam Jane) نے بھی مقابلے میں نمایاں کارکردگی کا مظاہرہ کرنے والے کامیاب شرکاء کو گولڈ سلور اور برونز میڈلز فراہم کرنے کا اعلان کیا ہے۔ ان کی جانب سے میڈلز کی فراہمی کے اعلان کو اس عالمی علمی سرگرمی کے لیے اہم تعاون قرار دیا جا رہا ہے۔پاکستان کوئز سوسائٹی انٹرنیشنل (رجسٹرڈ) کے بانی چیئرمین سید عاصم علی قادری نے اس خصوصی پروگرام کو ترتیب دیا ہے۔ ان کی جانب سے برطانوی پارلیمنٹ کے حوالے سے سوالات و جوابات مرتب کیے گئے ہیں، جن میں پارلیمانی تاریخ، اہم تاریخی واقعات، برطانوی جمہوریت، پارلیمنٹ کے ایوانوں، اراکین پارلیمنٹ، سابق وزرائے اعظم اور برطانیہ کے آئینی و سیاسی نظام سے متعلق معلومات کو شامل کیا گیا ہے۔اس موقع پر منتظمین کا کہنا ہے کہ کوئز مقابلے محض معلومات کے اظہار کا ذریعہ نہیں بلکہ یہ علم کے فروغ، مطالعے کے شوق، ذہنی تربیت، مثبت مسابقت اور مختلف ممالک کے لوگوں کے درمیان علمی روابط قائم کرنے میں بھی اہم کردار ادا کرتے ہیں۔ یوکے پارلیمنٹ ویک کے موقع پر اس بین الاقوامی کوئز کے انعقاد کا بنیادی مقصد بھی یہی ہے کہ دنیا بھر کے افراد کو برطانوی پارلیمانی تاریخ اور جمہوری روایات سے روشناس کرایا جائے اور انہیں ایک مثبت علمی سرگرمی میں شریک ہونے کا موقع فراہم کیا جائے۔پاکستان کوئز سوسائٹی انٹرنیشنل (رجسٹرڈ) نے دنیا بھر کے کوئز کے شائقین، طلبہ، اساتذہ، محققین اور عام شہریوں کو اس منفرد بین الاقوامی مقابلے میں شرکت کی دعوت دی ہے۔ منتظمین کے مطابق یہ ایک اوپن ٹو آل مقابلہ ہے، جس میں کسی بھی ملک سے تعلق رکھنے والا کوئی بھی دلچسپی رکھنے والا فرد بلا معاوضہ شرکت کر سکتا ہے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Fill out this field
Fill out this field
براہ مہربانی درست ای میل ایڈریس درج کریں۔
You need to agree with the terms to proceed