امریکی خلائی کمپنی اسپیس ایکس کے اسٹار شپ نے خلا سے زمین پر واپسی کا پہلا کامیاب تجربہ مکمل کرلیا ہے، جسے خلائی ٹیکنالوجی میں اہم پیش رفت قرار دیا جارہا ہے۔
میڈیا رپورٹس کے مطابق اسٹار شپ 22 گھنٹے سے زائد خلا میں موجود رہا اور اس دوران زمین کے 14 چکر مکمل کیے۔ بعد ازاں یہ امریکی ریاست ٹیکساس میں اپنے لانچنگ ٹاور پر واپس پہنچ گیا۔
اسٹار شپ کا یہ 15واں تجربہ تھا، جس میں پہلی مرتبہ راکٹ کے دونوں حصوں کی مکمل بحالی کا ہدف رکھا گیا تھا۔ اسپیس ایکس کا منصوبہ ہے کہ راکٹ کے بالائی اور نچلے دونوں حصوں کو دوبارہ استعمال کے قابل بنایا جائے۔
واضح رہے کہ اسٹار شپ کو دنیا کا طاقتور ترین راکٹ قرار دیا جاتا ہے۔ یہ دو بنیادی حصوں پر مشتمل ہے، جن میں سپر ہیوی بوسٹر اور اسٹار شپ اسپیس کرافٹ شامل ہیں۔
سپر ہیوی بوسٹر ایک بڑا راکٹ ہے جس میں 33 انجن نصب ہیں، جبکہ اسٹار شپ اسپیس کرافٹ اس کے اوپر موجود ہوتا ہے اور پرواز کے دوران بوسٹر سے الگ ہوجاتا ہے۔
اسٹار شپ کی خلا سے واپسی کا تاریخی منظر دیکھنے کے لیے بڑی تعداد میں لوگ جمع ہوئے۔ اس کامیاب تجربے کا امریکی خلائی ادارے ناسا نے بھی خیرمقدم کیا ہے۔
ناسا اس دہائی کے اختتام تک اپنے آرٹیمس پروگرام کے تحت خلابازوں کو چاند پر اتارنے اور وہاں مستقل قمری اڈہ قائم کرنے کے منصوبے پر کام کر رہا ہے۔ اس مقصد کے لیے ادارہ اسپیس ایکس کو اسٹار شپ کی تیاری اور ترقی کے سلسلے میں اربوں ڈالر ادا کر رہا ہے۔
اسٹار شپ کی لمبائی 120 میٹر جبکہ وزن تقریباً 50 لاکھ کلوگرام ہے۔ اسے اس انداز میں تیار کیا گیا ہے کہ اس کے مختلف حصوں کو بار بار استعمال کیا جاسکے۔
اسپیس ایکس پہلے ہی ناسا کے ساتھ معاہدہ کرچکی ہے، جس کے تحت اسٹار شپ کی مدد سے کئی دہائیوں بعد دوبارہ انسانوں کو چاند پر پہنچانے کا منصوبہ ہے۔
ناسا کے آرٹیمس 3 مشن کے تحت خلابازوں کو چاند کی سطح پر اتارنے کے لیے بھی اسٹار شپ استعمال کیا جائے گا۔
میڈیا رپورٹس کے مطابق ایلون مسک کا مستقبل کا منصوبہ مریخ پر انسانی آبادی کے لیے ایک شہر تعمیر کرنا ہے، جس کے لیے وہ اسٹار شپ راکٹوں کا ایک بڑا بیڑا تیار کرنا چاہتے ہیں۔







