قومی احتساب بیورو (نیب) نے خیبر پختونخوا میں بدعنوانی سے متعلق اہم انکوائریوں اور تحقیقات کے عمل میں تیزی پیدا کر دی ہے۔ حال ہی میں نیب کے ڈائریکٹر جنرل آپریشنز نے صوبے میں مبینہ مالی بے ضابطگیوں کے مقدمات پر جائزہ اجلاس کیا، تاہم سوشل میڈیا پر جے یو آئی (ف) کے سربراہ مولانا فضل الرحمان کے خلاف تحقیقات کی تیز رفتاری سے متعلق گردش کرنے والے دعوؤں کو نیب ذرائع نے مکمل طور پر بے بنیاد اور جھوٹا قرار دیا ہے۔
نیب حکام کے مطابق یہ گمراہ کن تاثر مصنوعی ذہانت (اے آئی) کی مدد سے تیار کردہ ایک جعلی ویڈیو کے ذریعے پھیلایا گیا۔ نیب ذرائع نے واضح کیا کہ مولانا فضل الرحمان سے متعلق کیس کی صورتحال میں کوئی تبدیلی نہیں آئی ہے اور آن لائن سنسنی پھیلانے کی کوشش کی گئی ہے۔
یہ وضاحت ایسے وقت میں سامنے آئی ہے جب نیب خیبر پختونخوا کے شہری ترقیاتی منصوبوں اور اپر کوہستان میں 37 ارب روپے سے زائد کے مالیاتی فراڈ کی تحقیقات پر اپنی توجہ مرکوز کر رہا ہے۔ ان کیسز میں سرکاری فنڈز کے غبن، مشتبہ رقوم کی منتقلی اور غیر قانونی ادائیگیوں کا جائزہ لیا جا رہا ہے۔ بیورو اس سے قبل اپر کوہستان کیس میں خطیر رقم کی برآمدگی اور اہم اثاثوں کے سراغ لگانے کی تصدیق کر چکا ہے۔
