یمن کے ساحلی شہر موخا میں سعودی فضائی حملے کے نتیجے میں 6 افراد جاں بحق اور 8 زخمی ہوگئے۔
حوثی ذرائع کے مطابق جاں بحق افراد میں 2 بچے اور ایک خاتون بھی شامل ہیں، جبکہ زخمیوں میں ایک بچہ اور ایک خاتون شامل ہیں۔ تاہم ان ہلاکتوں اور زخمیوں سے متعلق تفصیلات کی آزادانہ طور پر فوری تصدیق نہیں ہوسکی۔
یہ حملہ ایسے وقت میں ہوا ہے جب یمن میں حوثی فورسز اور سعودی حمایت یافتہ حکومتی فورسز کے درمیان لڑائی میں حالیہ دنوں کے دوران شدت آئی ہے۔
رپورٹ کے مطابق حوثی فورسز نے بحیرۂ احمر کے ساحلی علاقوں میں پیش قدمی کی ہے، جس کے بعد سعودی عرب کی جانب سے فضائی حملوں میں اضافہ ہوا ہے۔
دوسری جانب یمن کی گورننگ کونسل کے سربراہ رشاد العلیمی نے امریکی صدر ڈونلڈ ٹرمپ سے ٹیلی فون پر رابطہ کرکے حوثیوں کے خلاف امریکی حمایت طلب کی۔ العلیمی کے دفتر کے ایک ذریعے کے مطابق گفتگو کے دوران امریکی صدر نے براہِ راست فوجی مدد فراہم کرنے کا وعدہ نہیں کیا۔
موخا سمیت بحیرۂ احمر کے ساحلی علاقے عالمی تجارت اور توانائی کی ترسیل کے حوالے سے اہم سمجھے جاتے ہیں۔ باب المندب کے اطراف بڑھتی ہوئی کشیدگی کے باعث بحری راستوں اور تیل کی ترسیل کے تحفظ سے متعلق خدشات میں بھی اضافہ ہوا ہے۔
