بھارتی پنجاب کے وزیراعلیٰ بھگوت مان نے کہا ہے کہ بھارت میں ہونے والی ہاکی ایشین چیمپئنز ٹرافی میں پاکستان ہاکی ٹیم کی شرکت سے متعلق کوئی مسئلہ درپیش نہیں ہے۔ انہوں نے وضاحت کی کہ ملٹی نیشن ٹورنامنٹس کے حوالے سے حکومتی پالیسی بلکل واضح ہے جس کے تحت تمام شریک ٹیموں کو کھیلنے کا پورا حق حاصل ہوتا ہے۔
ایشین چیمپئنز ٹرافی کا انعقاد 27 اکتوبر سے 5 نومبر تک جالندھر اور موہالی میں ہونا طے پایا ہے، جس میں پاکستان کے ساتھ ساتھ بھارت، چین، جاپان، ملائیشیا اور جنوبی کوریا سمیت کل 6 ٹیمیں ہائی وولٹیج مقابلے کھیلیں گی۔
دوسری جانب ہاکی انڈیا کے سیکرٹری جنرل بھولا ناتھ سنگھ نے بھی پاکستان ہاکی فیڈریشن کے ساتھ خوشگوار تعلقات کا اعادہ کیا ہے۔ ان کا کہنا تھا کہ پاک بھارت مقابلوں کے موقع پر بھی وہ سپورٹس مین اسپرٹ کا مظاہرہ کرتے ہوئے سب سے پہلے پاکستانی ٹیم سے ملاقات کرتے ہیں۔ مزید برآں، انتظامی امور کو سنبھالنے اور کسی بھی ٹیم کے عدم دستیابی یا بائیکاٹ کی صورت کے لیے عمان اور بنگلہ دیش کی ٹیموں کو ریزرو کے طور پر رکھا گیا ہے۔
