اسلام آباد میں قائم تمام نجی تعلیمی اداروں میں زیر تعلیم بچوں اور تدریسی عملے کے تحفظ کو یقینی بنانے کے لیے ایک اہم پیشرفت سامنے آئی ہے۔ پرائیویٹ ایجوکیشنل انسٹیٹیوشنز ریگولیٹری اتھارٹی (پیرا) نے شہر کے تمام نجی اسکولوں کے لیے کیپیٹل ڈیولپمنٹ اتھارٹی (سی ڈی اے) سے فائر اینڈ لائف سیفٹی سرٹیفکیٹ کا حصول ضروری قرار دے دیا ہے۔
پیرا کی جانب سے جاری کردہ تازہ ترین ہدایت نامے میں تمام نجی اسکولوں کی انتظامیہ کو واضح کیا گیا ہے کہ وہ اگلے ۱۵ دنوں کے اندر فائر سیفٹی این او سی حاصل کر کے اتھارٹی کے پاس جمع کروائیں۔ ادارے کا کہنا ہے کہ اس اقدام کا بنیادی مقصد تعلیمی اداروں میں ہنگامی صورتحال سے نمٹنے اور طلبہ و اسٹاف کے جانی تحفظ کو مکمل طور پر یقینی بنانا ہے۔
ریگولیٹری اتھارٹی نے متنبہ کیا ہے کہ ان قوانین کی پاسداری نہ کرنے والے نجی تعلیمی اداروں کے خلاف سخت قانونی کارروائی عمل میں لائی جائے گی۔ فائر سیفٹی کے طے شدہ ضوابط پر عمل نہ کرنے والے اسکولوں کو فوری طور پر سیل کر دیا جائے گا۔
