ڈیرہ اسماعیل خان میں ریجنل پولیس آفیسر (آر پی او) غلام مبشر میکن نے دہشت گردوں کے بزدلانہ حملے کے بعد تھانہ بندکورائی کا دورہ کیا۔ اس موقع پر ڈی پی او ڈیرہ ضیاء الدین احمد، ایس پی سی ٹی ڈی اور ایس پی پہاڑپور اقبال بھی ان کے ہمراہ موجود تھے۔ دورے کے دوران آر پی او نے حملے کے نتیجے میں تھانے کی عمارت اور مسجد کو پہنچنے والے نقصانات کا جائزہ لیا اور واقعے کے متعلق تفصیلی بریفنگ حاصل کی۔
حکام کے مطابق رات گئے دہشت گردوں نے بھاری ہتھیاروں سے تھانہ بندکورائی پر حملہ کیا اور بارود سے بھری پک اپ گاڑی تھانے کے مرکزی گیٹ سے ٹکرا دی، جس سے تھانے کی دیوار اور مسجد کو نقصان پہنچا۔ تاہم، پولیس جوانوں کی پیشہ ورانہ مہارت اور فوری جوابی کارروائی کے باعث دہشت گرد اپنے مذموم عزائم میں ناکام رہے اور واقعے میں تمام پولیس اہلکار محفوظ رہے۔
آر پی او ڈیرہ غلام مبشر میکن نے شجاعت اور دلیری کا مظاہرہ کرنے والے پولیس جوانوں کو نقد انعامات سے نوازتے ہوئے انہیں خیبر پختونخوا پولیس کا قابلِ فخر سرمایہ قرار دیا۔ انہوں نے علاقے کے عوام کی جانب سے بروقت تھانے پہنچ کر پولیس کے شانہ بشانہ کھڑے ہونے کو سراہتے ہوئے کہا کہ عوام اور پولیس کے مثالی اتحاد سے دہشت گردی کا مکمل خاتمہ کیا جائے گا اور عوام کے جان و مال کے تحفظ پر کوئی سمجھوتہ نہیں ہوگا۔
