پشاور میں کیپٹل سٹی پولیس نے جرائم پیشہ عناصر کے خلاف کارروائی کرتے ہوئے چوری، راہزنی، موٹرسائیکل لفٹنگ اور اسنیچنگ کی وارداتوں میں ملوث گینگ کا سراغ لگا کر تین ملزمان کو گرفتار کر لیا ہے۔ یہ کارروائی ایس پی کینٹ ڈویژن محمد جنید کھرل کی ہدایات پر ڈی ایس پی حیات آباد سرکل رضاء باچا خان کی نگرانی میں ایس ایچ او تھانہ تاتارا ارشد خان نے دیگر پولیس نفری کے ہمراہ انجام دی۔
گرفتار ملزمان کی شناخت شمس اللہ ولد بہادر خان، شبیر ولد محمد شریف اور عمیر ولد سلطان محمد کے ناموں سے ہوئی ہے۔ پولیس کے مطابق ملزمان شہر کے مختلف علاقوں میں موبائل فون اور لیپ ٹاپ چوری سمیت موٹرسائیکل لفٹنگ اور اسنیچنگ کی سنگین وارداتوں میں ملوث تھے۔
کامیاب کارروائی کے دوران ملزمان کے قبضے سے مسروقہ 4 عدد موٹرسائیکلیں، موبائل فونز، لیپ ٹاپ اور چوری شدہ موٹرسائیکلیں فروخت کرنے کے عوض حاصل کی گئی 1 لاکھ 15 ہزار روپے نقد رقم بھی برآمد کر لی گئی ہے۔ پولیس حکام کے مطابق گرفتار ملزمان سے مزید تفتیش جاری ہے جس میں دیگر اہم انکشافات کی توقع ہے۔
