گورنر خیبرپختونخوا فیصل کریم کنڈی نے پاکستان تحریک انصاف (پی ٹی آئی) کے ساتھ کسی بھی قسم کے مذاکرات کا امکان سِرے سے مسترد کر دیا ہے۔ پشاور میں ذرائع ابلاغ سے گفتگو کرتے ہوئے انہوں نے کہا کہ پی ٹی آئی سے مذاکرات کا سوال ہی پیدا نہیں ہوتا، کیونکہ یہ پارٹی خود اندرونی طور پر مختلف گروپس میں تقسیم ہو چکی ہے۔
فیصل کریم کنڈی کا کہنا تھا کہ پی ٹی آئی چار مختلف فرنچائزز میں بٹ چکی ہے اور ان کی اپنی جماعت اپنے چیئرمین، جنرل سیکریٹری اور اسسٹنٹ اسپیکر تک کی بات تسلیم نہیں کرتی، تو ایسے میں وہ کسی اور کے ساتھ کیا مذاکرات کریں گے۔ انہوں نے طنزاً کہا کہ پی ٹی آئی کو پہلے یہ واضح کرنا چاہیے کہ ان کی اصل اوریجنل فرنچائز کون سی ہے۔
صوبائی انتظام پر تشویش کا اظہار کرتے ہوئے گورنر کے پی نے بتایا کہ جس محکمے کی بریفنگ لی جائے، اس کی ناقص صورتحال دیکھ کر سر پکڑنا پڑتا ہے۔ انہوں نے شہر میں جاری صفائی کی مثال دیتے ہوئے سوال اٹھایا کہ کیا یہ کام پہلے نہیں ہو سکتا تھا؟ ماضی میں ملازمین یا تو حکام کے گھروں میں کام کر رہے تھے یا مفت میں تنخواہیں لے رہے تھے، لیکن اب بغیر کام تنخواہ لینے والوں کو نوکری سے ہاتھ دھونا پڑیں گے اور جزا و سزا کا شفاف نظام قائم کیا جائے گا۔
گفتگو کے اختتام پر سہیل آفریدی کے معاملے پر بات کرتے ہوئے گورنر کا کہنا تھا کہ ان کے وارنٹ گرفتاری کے تمام قانونی تقاضے پورے کیے جائیں گے۔
