پشاور میں لوڈشیڈنگ بے قابو، بعض علاقوں میں16گھنٹے تک بجلی بند

صوبائی دارالحکومت پشاور میں لوڈشیڈنگ بے قابو ، شہر کے مختلف علاقوں میں 5 سے 16 گھنٹے تک بجلی کی بندش سے شہریوں کے معمولات زندگی متاثر ہونے لگے۔ اندرون شہر سمیت متعدد علاقوں میں کئی کئی گھنٹے بجلی غائب رہنے سے عوام کو مشکلات کا سامنا ہے، جبکہ شہریوں نے طویل لوڈشیڈنگ پر تشویش کا اظہار کیا ہے۔موصولہ اطلاعات کے مطابق پشاور کے بعض علاقوں میں بجلی کی بندش 16 گھنٹے تک پہنچ گئی ہے، جس سے گھریلو سرگرمیاں اور روزمرہ کے معمولات متاثر ہو رہے ہیں۔پشاور کے اندرون شہر میں غیر اعلانیہ لوڈشیڈنگ کا سلسلہ بدستور جاری ہے۔ مختلف علاقوں میں 5 گھنٹے سے زائد بجلی بند رہنے کی اطلاعات ہیں، جس کے باعث شہریوں کو روزمرہ امور کی انجام دہی میں مشکلات پیش آ رہی ہیں۔پشاور میں لوڈشیڈنگ بے قابو ہونے کے باعث گھریلو صارفین سمیت کاروباری سرگرمیاں بھی متاثر ہو رہی ہیں۔شہر کے مختلف علاقوں میں لوڈشیڈنگ کا دورانیہ مختلف ہے، اطلاعات کے مطابق گلبرگ، نوتھیہ اور لنڈی ارباب میں 8 گھنٹے تک بجلی کی بندش معمول بن گئی ہے۔مسلسل بجلی نہ ہونے سے شہریوں کو گھریلو کاموں اور دیگر روزمرہ ضروریات پوری کرنے میں دشواری کا سامنا ہے، کوٹلہ محسن خان اور کوہاٹ روڈ پر بھی بجلی کی طویل بندش کی اطلاعات موصول ہوئی ہیں۔ ان علاقوں میں 10 گھنٹے سے زائد لوڈشیڈنگ جاری ہے، جس سے شہریوں کی مشکلات میں اضافہ ہو رہا ہے۔چارسدہ روڈ، ورسک روڈ، دلہ زاک روڈ اور ملحقہ علاقوں میں 12 گھنٹے تک بجلی کی لوڈشیڈنگ کی اطلاعات ہیں۔طویل دورانیے تک بجلی کی عدم دستیابی نے شہریوں کے معمولات کو متاثر کر رکھا ہے، جبکہ غیر اعلانیہ بندش کے باعث بجلی کی فراہمی کے اوقات کے بارے میں بھی غیر یقینی صورتحال برقرار ہے۔پشاور کے مضافاتی علاقے بڈھ بیر، پشتخرہ، ہزار خوانی اور ملحقہ علاقوں میں صورتحال مزید سنگین بتائی جا رہی ہے، جہاں 16 گھنٹے تک بجلی کی بندش جاری ہے۔شہر کے مختلف علاقوں میں طویل لوڈشیڈنگ کے باعث شہریوں کو شدید مشکلات کا سامنا ہے۔ بجلی کی فراہمی میں بہتری اور غیر اعلانیہ بندش کے خاتمے کے لیے متعلقہ حکام کی جانب سے اقدامات کی ضرورت ہے۔