شمالی وزیرستان کے ہیڈکوارٹر میرانشاہ کیمپ میں شہید ایس ایچ او میرا خان کی نمازِ جنازہ ادا کر دی گئی، جس میں جی او سی 7 ڈویژن سمیت اعلیٰ سول و عسکری قیادت نے شرکت کی۔
نمازِ جنازہ کی تقریب میں پاک فوج کے سینئر افسران، ضلعی و سول انتظامیہ کے حکام اور پولیس کے اعلا افسران بڑی تعداد میں موجود تھے۔ اس موقع پر پولیس کے چاق و چوبند دستے نے شہید کے جسدِ خاکی کو روایتی سلامی پیش کی، جس کے بعد انہیں پورے فوجی و سرکاری اعزاز کے ساتھ آخری منزل کی طرف روانہ کیا گیا۔
تقریب کے دوران جی او سی 7 ڈویژن اور دیگر تمام شرکاء نے شہید ایس ایچ او میرا خان کی عظیم قربانی کو زبردست الفاظ میں خراجِ عقیدت پیش کیا۔ انہوں نے کہا کہ ملک میں امن و امان کی بحالی اور شہریوں کے تحفظ کی خاطر شہید کی خدمات اور دفاعِ وطن کے لیے دی گئی یہ قربانی ہمیشہ یاد رکھی جائے گی۔
