سردیوں کے آمد یا ہوائیں خشک ہوتے ہی چہرے کی جلد میں کھنچاؤ اور بے رونقی کی شکایت عام ہو جاتی ہے۔ ایسے میں ماہرین کے مطابق پیٹرولیم جیلی جلد کو نرم اور شاداب رکھنے کے لیے ایک بہترین، سادہ اور انتہائی کم قیمت حل ثابت ہو سکتی ہے۔
پیٹرولیم جیلی خود سے جلد میں پانی کی مقدار شامل نہیں کرتی، بلکہ یہ جلد کی سطح پر ایک حفاظتی تہہ قائم کر دیتی ہے جس سے اندرونی نمی ضائع ہونے سے بچ جاتی ہے۔ یہی وجہ ہے کہ بار بار چہرہ دھونے، سخت سرد ہواؤں اور خشک موسم سے متاثرہ جلد کے لیے یہ ایک زبردست محافظ کے طور پر کام کرتی ہے۔
رات کو چہرہ کسی ہلکے کلینزر سے دھونے کے بعد جب جلد ہلکی نم ہو تو موئسچرائزر لگائیں، اور پھر اس کے اوپر پیٹرولیم جیلی کی ایک باریک تہہ خاص طور پر خشک حصوں پر لگا لیں۔ یہ طریقہ خشک اور پھٹے ہوئے ہونٹوں کی نمی بحال کرنے کے ساتھ ساتھ بھنووں کو سیٹ اور ترتیب میں رکھنے کے لیے بھی استعمال کیا جا سکتا ہے۔
تاہم یہ بات مدنظر رکھنی چاہیے کہ اگر جلد پر پہلے سے کوئی شدید انفیکشن، جلن یا جلدی بیماری ہو تو گھریلو ٹوٹکوں کے بجائے ماہر امراض جلد (ڈرمیٹولوجسٹ) سے رجوع کرنا ضروری ہے۔
