پاکستان اسپیس اینڈ اپر ایٹموسفیئر ریسرچ کمیشن (سپارکو) کے چیئرمین محمد یوسف خان نے ورلڈ اسپیس ویک کی سرگرمیوں کا باضابطہ طور پر افتتاح کر دیا ہے۔ اس سال یہ عالمی ہفتہ "راکٹ انقلاب” (Rocket Revolution) کے بین الاقوامی موضوع کے تحت منایا جا رہا ہے، جس کے سلسلے میں ملک بھر میں ہفتہ بھر جاری رہنے والی مختلف سائنسی اور تعلیمی سرگرمیوں کا آغاز ہو چکا ہے۔
افتتاحی تقریب کے موقع پر خلائی علوم کی اہمیت اور ملکی پیشرفت پر روشنی ڈالی گئی۔ اس موقع پر یہ اہم پیشرفت بھی سامنے آئی کہ پاکستان اپنے پہلے خلاباز کو چینی خلائی اسٹیشن (تیان گونگ) بھیجنے کی جامع منصوبہ بندی پر تیزی سے کام کر رہا ہے، جو دونوں ممالک کے درمیان خلائی تعاون کا ایک نیا باب ثابت ہوگا۔ سپارکو کی جانب سے کاوشوں کا مقصد نوجوانوں کو خلائی ٹیکنالوجی، سائنسی تحقیق اور راکٹری کی جدید دنیا کی جانب راغب کرنا ہے۔
