نیوزی لینڈ نے بھارت کے خلاف آئندہ ماہ ہونے والی 5 میچوں کی ٹی20 سیریز کے لیے 16 رکنی اسکواڈ کا اعلان کردیا، جس میں فاسٹ باؤلر ایڈم ملن اور آل راؤنڈر مائیکل بریسویل کی واپسی ہوئی ہے۔
نیوزی لینڈ کرکٹ کے مطابق دونوں کھلاڑی انجری کے باعث رواں سال ہونے والے ٹی20 ورلڈ کپ میں شرکت نہیں کرسکے تھے۔ ٹی20 ورلڈ کپ کے فائنل میں بھارت کے ہاتھوں شکست کے بعد رنر اپ رہنے والی نیوزی لینڈ کی ٹیم کے 13 کھلاڑیوں کو اسکواڈ میں برقرار رکھا گیا ہے۔
نیوزی لینڈ اور بھارت کے درمیان 5 ٹی20، 5 ون ڈے اور 2 ٹیسٹ میچز کھیلے جائیں گے۔ دونوں ٹیموں کے درمیان پہلا ٹی20 میچ 22 اکتوبر کو کرائسٹ چرچ میں ہوگا۔
دائیں کندھے کی انجری کے باعث راچن رویندرا ٹی20 سیریز کا حصہ نہیں ہوں گے۔ وہ گزشتہ ہفتے ایک کمرشل شوٹنگ کے دوران کندھا اترنے سے زخمی ہوئے تھے، تاہم ان کی ون ڈے سیریز تک واپسی متوقع ہے۔
نیوزی لینڈ کے اوپنرز ٹم سیفرٹ اور فن ایلن بھی ایک مرتبہ پھر ایک ساتھ اننگز کا آغاز کرتے دکھائی دیں گے۔ دونوں نے آخری بار نیوزی لینڈ کے ٹی20 ورلڈ کپ کے فائنل تک پہنچنے کے سفر کے دوران اوپننگ کی تھی۔
فاسٹ باؤلر بین سیئرز بھی ٹخنے کی انجری سے بحالی کے باعث اسکواڈ میں شامل نہیں ہیں۔
نیوزی لینڈ کے کوچ روب والٹر نے کہا کہ ٹیم کے پاس متبادل کھلاڑیوں کی اچھی تعداد موجود ہے، اس لیے ورک لوڈ کو مدنظر رکھتے ہوئے سیریز کے دوران تمام 16 کھلاڑیوں کو موقع دینے کی کوشش کی جائے گی۔
انہوں نے بھارت کو ایک مضبوط اور مشکل حریف قرار دیتے ہوئے کہا کہ اپنے ہوم گراؤنڈز پر کیوی شائقین کے سامنے اس کا مقابلہ کرنا پرجوش تجربہ ہوگا۔
روب والٹر کے مطابق زیادہ تر میچز کے ٹکٹ فروخت ہونے کی اطلاعات ہیں اور امید ہے کہ یہ مقابلے شاندار ثابت ہوں گے۔
انہوں نے کہا کہ ٹیم انتظامیہ نے ممکنہ طور پر بہترین اسکواڈ منتخب کرنے کی کوشش کی ہے، جس میں مختصر فارمیٹ کے ماہر کھلاڑی ٹم سیفرٹ اور فن ایلن بھی شامل ہیں۔ ان کے مطابق ٹیم کی ترجیح میچ جیتنا اور میدان میں بہترین کھلاڑیوں کو اتارنا ہے۔
نیوزی لینڈ کے اسکواڈ میں مچل سینٹنر کپتان، فن ایلن، مائیکل بریسویل، مارک چیپ مین، ڈیون کونوے، جیکب ڈفی، لوکی فرگوسن، زیک فولکس، میٹ ہنری، بیون جیکبز، کائل جیمیسن، ایڈم ملن، ڈیرل مچل، گلین فلپس، ٹم سیفرٹ اور ناتھن اسمتھ شامل ہیں۔
