(ویب ڈیسک) طاقتور سمندری طوفان ٹائیفون دوجوان جاپان کے بحرالکاہل کے ساحلی علاقوں کی جانب بڑھ رہا ہے، جس کے باعث کانتو ریجن اور مشرقی جاپان کے دیگر علاقوں میں شدید بارش، تیز ہواؤں اور سیلاب کا خطرہ بڑھ گیا ہے۔
جاپان کے محکمہ موسمیات نے خبردار کیا ہے کہ طوفان کے باعث موسم کی صورتحال تیزی سے خراب ہوسکتی ہے۔ محکمہ موسمیات کے مطابق ٹائیفون دوجوان دن کے اختتام تک ٹوکیو کے میٹروپولیٹن علاقے کے قریب سے گزر سکتا ہے۔
آئیزو جزائر، چیبا پریفیکچر اور بحرالکاہل کے ساحلی علاقوں کے دیگر حصوں میں پہلے ہی شدید بارشیں ہوچکی ہیں۔ بعض مقامات پر ہفتے سے اب تک 300 ملی میٹر یعنی 12 انچ سے زائد بارش ریکارڈ کی گئی ہے۔
محکمہ موسمیات کے مطابق ٹائیفون کے کانتو ریجن کے قریب پہنچنے کے ساتھ پیر کی سہ پہر سے بارشوں کی شدت مزید بڑھ سکتی ہے۔ کانتو ریجن میں ٹوکیو اور اس کے گردونواح کے متعدد پریفیکچرز شامل ہیں۔
دوسری جانب وسطی جاپان کے ایچی پریفیکچر میں جاری ایشین گیمز کے دوران منتظمین نے ٹائیفون کے پیش نظر گھڑ سواری کے ایونٹنگ مقابلے ملتوی کرکے منگل کو منتقل کردیئے ہیں۔
حکام نے خبردار کیا ہے کہ کانتو اور وسطی جاپان میں مسلسل اور مرتکز بارشی بینڈز بن سکتے ہیں، جس کے نتیجے میں اچانک سیلاب اور بارش سے متعلق دیگر قدرتی آفات کا خطرہ بڑھ سکتا ہے۔
جاپان میں حالیہ برسوں کے دوران ایسے بارشی بینڈز تشویش کا باعث بنے ہیں، جو محدود علاقوں میں کئی گھنٹوں تک غیرمعمولی مقدار میں بارش برسا سکتے ہیں۔
ٹائیفون دوجوان ایسے وقت میں جاپان کی جانب بڑھ رہا ہے جب دنیا کے مختلف علاقوں میں شدید موسمی واقعات، غیرمعمولی بارشوں، سیلاب اور سمندری طوفانوں کے واقعات رپورٹ ہورہے ہیں۔
