روم: اطالوی وزیراعظم جارجیا میلونی نے اسکولوں میں نقاب اور برقعہ پہننے پر پابندی عائد کرنے کی تجویز کا اعلان کردیا۔
غیر ملکی خبر ایجنسیوں کے مطابق میلونی نے کہا کہ حکومت جلد ایک ایسا اقدام کابینہ کے سامنے پیش کرے گی جس کے تحت اسکولوں میں نقاب اور برقعہ پہننے پر پابندی ہوگی۔ یہ تجویز تاحال قانون نہیں بنی اور اسے کابینہ کے بعد پارلیمانی منظوری کے مرحلے سے گزرنا ہوگا۔
تجویز میں ہر کلاس میں غیر ملکی طلبہ کی تعداد کی ایک زیادہ سے زیادہ حد مقرر کرنے کی بات بھی شامل ہے۔ تاہم حکومت نے فی الحال اس حد کی حتمی تعداد واضح نہیں کی۔
میلونی کے مطابق ایسے غیر ملکی طلبہ کے والدین کو بھی اطالوی زبان سیکھنا ہوگی جن کے بچوں کو اسکول میں انضمام کے حوالے سے شدید مشکلات کا سامنا ہو۔
اطالوی وزیراعظم نے ان اقدامات کو اسکولوں میں انضمام، زبان سیکھنے اور ملکی قوانین و ثقافت سے واقفیت کے تناظر میں پیش کیا ہے۔
