بنوں میں تھانہ میراخیل پولیس نے چوری کے ایک مقدمے میں کارروائی کرتے ہوئے واردات میں مبینہ طور پر ملوث ایک ملزم کو گرفتار کر لیا۔ پولیس نے ملزم کے قبضے سے مختلف کمپنیوں کے 21 مسروقہ موبائل فونز اور تقریباً 70 ہزار روپے نقد رقم برآمد کر کے اپنی تحویل میں لے لی۔
پولیس کے مطابق یہ کارروائی ایس ڈی پی او رورل ٹو عصمت اللہ خان کی نگرانی میں کی گئی۔ ایس ایچ او تھانہ میراخیل بلال خان نے پولیس ٹیم کے ہمراہ دوران گشت مخبر کی اطلاع پر کارروائی کرتے ہوئے منصف اللہ شاہ ولد وحید اللہ شاہ سکنہ منجہ خیل کو گرفتار کیا۔
گرفتاری کے بعد تلاشی کے دوران ملزم کے قبضے سے مختلف کمپنیوں کے 21 مسروقہ موبائل فونز اور تقریباً 70 ہزار روپے نقد رقم برآمد ہوئی، جسے پولیس نے ضبط کر لیا۔
ابتدائی تفتیش میں ملزم نے انکشاف کیا کہ واردات میں دیگر افراد بھی مبینہ طور پر شریک تھے، جن میں کاشف اللہ شاہ، سید ولی، شہزاد دکاندار اور کامران دکاندار شامل ہیں۔ پولیس کے مطابق ابتدائی معلومات سے معلوم ہوا ہے کہ برآمد ہونے والے موبائل فونز ضلع بنوں سمیت مختلف شہروں سے مختلف اوقات میں چوری کیے گئے تھے۔
پولیس نے واقعے کا مقدمہ نمبر 655/2026 درج کرکے مزید تفتیش شروع کر دی ہے، جبکہ دیگر ملزمان کی گرفتاری کے لیے کارروائیاں جاری ہیں۔ پولیس کا کہنا ہے کہ باقی نامزد افراد کو بھی جلد قانون کے کٹہرے میں لایا جائے گا۔
ڈی پی او بنوں کیپٹن (ر) محمد فرقان بلال نے کارروائی میں حصہ لینے والی پولیس ٹیم کی کارکردگی کو سراہتے ہوئے کہا کہ بنوں پولیس عوام کے جان و مال کے تحفظ اور جرائم پیشہ عناصر کے خلاف بلاامتیاز کارروائیوں کا سلسلہ جاری رکھے گی۔
