شیرعالم شنواری، پشاور
پاکستان کے نامور ماہرِ ارضیات اور پشاور یونیورسٹی کے سابق وائس چانسلر، ڈاکٹر ایم قاسم جان کو پاکستان اور چین کے درمیان تعلیمی روابط کو فروغ دینے اور سائنسی تعاون کو مضبوط بنانے میں ان کی لازوال خدمات کے اعتراف میں چین کے اعلیٰ ترین شہری اعزاز "چائنا فرینڈشپ ایوارڈ” سے نوازا گیا ہے۔ اس شاندار بین الاقوامی پذیرائی پر ملک بھر کے سائنسی اور تعلیمی حلقوں بالخصوص خیبر پختونخوا کی علمی برادری میں مسرت کی لہر دوڑ گئی ہے۔
ڈاکٹر ایم قاسم جان، جو پشاور یونیورسٹی کے شعبہ ارضیات سے بطور پروفیسر ایمریٹس وابستہ ہیں اور ایچ ای سی (HEC) کے ممتاز قومی پروفیسر کا درجہ رکھتے ہیں، دنیا بھر کے سائنسی افق پر ایک معتبر اور معروف نام کے طور پر جانے جاتے ہیں۔ انہوں نے نہ صرف تحقیق، تدریس اور سائنسی تعاون کے شعبوں میں گراں قدر خدمات انجام دی ہیں بلکہ پاکستان میں ارضیاتی علوم کی جدید بنیادیں استوار کرنے میں بھی کلیدی کردار ادا کیا ہے۔ وہ چائنیز اکیڈمی آف سائنسز کے منتخب رکن (Academician) ہونے کے ساتھ ساتھ دی ورلڈ اکیڈمی آف سائنسز (TWAS)، اسلامک ورلڈ اکیڈمی آف سائنسز، اور پاکستان اکیڈمی آف سائنسز کے فیلو بھی ہیں۔ اس سے قبل انہیں 2024 میں چائنیز اکیڈمی آف سائنسز کی جانب سے بین الاقوامی سائنسی تعاون کا ایوارڈ بھی عطا کیا جا چکا ہے۔
ڈاکٹر قاسم جان کی تعلیمی اور تحقیقی سفر کی تاریخ انتہائی درخشاں ہے۔ انہوں نے اپنی ابتدائی اعلیٰ تعلیم بی ایس سی (آنرز) کی صورت میں پشاور یونیورسٹی سے مکمل کی، جس کے بعد اعلیٰ تعلیم کی غرض سے بیرونِ ملک مقیم رہے اور امریکی ریاست اوریگون سے ایم ایس اور بعد ازاں لندن سے پی ایچ ڈی کی اعلیٰ ترین سند حاصل کی۔ ان کی علمی اور تحقیقی کاوشوں کا بنیادی محور شمال مغربی ہمالیہ، نگر پارکر اور بلوچستان کی پیچیدہ ارضیاتی ساخت رہی ہے۔ انہوں نے معدنیاتی، پیٹرولوجیکل (سنگِیات) اور ٹیکٹونک مطالعے کے ذریعے زمین کی قشر (Crustal Processes) کی تشکیل اور ارتقاء پر جو گہرے تحقیقی مقالے اور کتابیں تحریر کی ہیں، وہ عالمی سطح پر مستند علمی حوالوں کے طور پر ماننی جاتی ہیں۔ وہ اب تک سینکڑوں مضامین کی تصنیف و تدوین کر چکے ہیں اور دنیا کے تمام براعظموں کی نامور جامعہ میں مدعو استاد کی حیثیت سے لیکچرز دے چکے ہیں۔
اپنی عملی اور انتظامی زندگی میں وہ کئی جلیل القدر عہدوں پر فائز رہے، جن میں پشاور یونیورسٹی، قائد اعظم یونیورسٹی اسلام آباد اور سرحد یونیورسٹی کے وائس چانسلر کے منصب شامل ہیں۔ اس کے علاوہ وہ خیبر پختونخوا کے صوبائی نگران وزیرِ تعلیم، پاکستان اکیڈمی آف سائنسز کے صدر، الائنس آف انٹرنیشنل سائنس آرگنائزیشنز (ANSO) کے بانی نائب صدر، اور ایسوسی ایشن آف اکیڈمیز اینڈ سوسائٹیز آف سائنسز ان ایشیا کے سیکرٹری جنرل کے طور پر بھی خدمات سرانجام دے چکے ہیں۔
ان کی اسی بے لوث علمی جدوجہد پر انہیں حکومتِ پاکستان کی طرف سے ہلالِ امتیاز (2010)، ستارہِ امتیاز (1999)، تمغہِ امتیاز (1994) اور تدریس کا اعلیٰ صدارتی اعزاز اعزازِ فضیلت (1993) عطا کیا گیا۔ اس کے علاوہ کنگز کالج لندن اور یونیورسٹی آف لیسٹر نے انہیں آنریری ڈاکٹر آف سائنس کی ڈگریوں سے بھی نوازا۔
پشاور یونیورسٹی کے موجودہ انتظامیہ اور اساتذہ نے اپنے اس سابق سربراہ اور عظیم سائنسدان کی اس عالمی کامیابی پر دلی مسرت اور فخر کا اظہار کیا ہے۔ جامعہ کی انتظامیہ کے مطابق، چائنا فرینڈشپ ایوارڈ ڈاکٹر قاسم جان کی تاحیات سائنسی و تعلیمی خدمات اور پاک-چین دوستی کو اعلیٰ تعلیم کی سطح پر قائم رکھنے کی انتھک کوششوں کا برحق اعتراف ہے۔
