فیفا ورلڈ کپ 2026: گروپ مرحلے کا اختتام، آئیوری کوسٹ، ایکواڈور، جاپان اور آسٹریلیا ناک آؤٹ مرحلے میں پہنچ گئے
سلیمان خان
فیفا ورلڈ کپ 2026ء کے گروپ مرحلے کے آخری مقابلے سنسنی، جوش اور ڈرامائی لمحات سے بھرپور رہے، جن کے اختتام پر آئیوری کوسٹ، ایکواڈور، جاپان اور آسٹریلیا نے کامیابی کے ساتھ راؤنڈ آف 32 (ناک آؤٹ مرحلے) کے لیے کوالیفائی کر لیا۔ آخری روز کے میچز میں ترکیہ نے ایونٹ سے رخصت ہونے سے قبل امریکہ کو شکست دے کر بڑا اپ سیٹ کیا، جبکہ آسٹریلیا نے اہم ڈرا کھیل کر اگلے مرحلے میں جگہ بنا لی۔
گروپ ڈی کے اہم میچ میں لاس اینجلس میں ترکیہ نے امریکہ کو 2-3 سے شکست دے کر ٹورنامنٹ کا اختتام فتح کے ساتھ کیا۔ اگرچہ ترکیہ پہلے ہی ایونٹ سے باہر ہو چکا تھا، تاہم اس نے ناقابلِ شکست امریکہ کے خلاف شاندار کھیل کا مظاہرہ کیا۔
امریکہ نے تیسرے ہی منٹ میں آسبرن ٹرسٹی کے گول کی بدولت برتری حاصل کی، لیکن ترکیہ کے نوجوان اسٹار اردا گولر نے دسویں منٹ میں خوبصورت گول کر کے مقابلہ برابر کر دیا۔ اس گول کے ساتھ وہ ترکیہ کی تاریخ کے کم عمر ترین ورلڈ کپ گول اسکورر بھی بن گئے۔ 31 ویں منٹ میں باریس یلماز نے ترکیہ کو 1-2 کی برتری دلائی، تاہم دوسرے ہاف کے آغاز میں برہالٹر نے 49 ویں منٹ میں امریکہ کے لیے برابری کا گول کر دیا۔ میچ جب ڈرا کی جانب بڑھ رہا تھا تو اضافی وقت کے آٹھویں منٹ (98 ویں منٹ) میں کان ایہان نے فیصلہ کن گول کر کے ترکیہ کو 2-3 سے یادگار فتح دلا دی۔ شکست کے باوجود امریکہ 6 پوائنٹس کے ساتھ گروپ میں پہلی پوزیشن پر برقرار رہا، جبکہ اردا گولر کو شاندار کارکردگی پر میچ کا بہترین کھلاڑی قرار دیا گیا۔
گروپ کے دوسرے مقابلے میں سان فرانسسکو بے ایریا اسٹیڈیم میں آسٹریلیا اور پیراگوئے کی ٹیمیں بغیر کسی گول کے برابر رہیں۔ آسٹریلیا نے میچ میں کئی خطرناک حملے کیے، مگر پیراگوئے کے منظم دفاع کے سامنے کامیاب نہ ہو سکا۔ یہ ڈرا آسٹریلیا کے لیے انتہائی قیمتی ثابت ہوا اور وہ گروپ میں دوسری پوزیشن حاصل کرتے ہوئے ناک آؤٹ مرحلے میں پہنچ گیا۔ آسٹریلیا اب 3 جولائی کو ڈلاس میں گروپ جی کی رنر اپ ٹیم کے خلاف پری کوارٹر فائنل کھیلے گا، جبکہ پیراگوئے کی قسمت کا فیصلہ دیگر گروپس کے نتائج کے بعد ہوگا۔ آسٹریلیا کے ایڈن او نیل کو میچ کا بہترین کھلاڑی قرار دیا گیا۔
گروپ مرحلے کے اختتام پر آئیوری کوسٹ، ایکواڈور، جاپان اور آسٹریلیا نے اگلے مرحلے میں اپنی جگہ مستحکم کر لی ہے، جبکہ ناک آؤٹ مرحلے کے آغاز کے ساتھ ہی فیفا ورلڈ کپ 2026ء میں ٹائٹل کی جنگ مزید دلچسپ اور سخت ہونے کی توقع کی جا رہی ہے۔
