منزل فاؤنڈیشن نے محکمہ سماجی بہبود خیبرپختونخوا کے ساتھ ایک اہم اسٹیک ہولڈرز اجلاس میں شرکت کی، جس میں خواجہ سرا کمیونٹی کو درپیش مسائل اور ان کے بنیادی حقوق کی فراہمی، بشمول صحت اور روزگار کوٹے پر بات چیت کی گئی۔
منزل فاؤنڈیشن نے اجلاس کے دوران زور دیا کہ خواجہ سرا افراد کے لیے تیار کی گئی "ہیلتھ گائیڈ لائنز اور پروٹیکشن پالیسی” کو فوری طور پر منظور کیا جائے۔ یہ پالیسی خواجہ سرا کمیونٹی اور متعلقہ اسٹیک ہولڈرز کی مشاورت سے مرتب کی گئی ہے، جس کا مقصد ان کی صحت، تحفظ اور فلاح و بہبود کو یقینی بنانا ہے۔
اس کے علاوہ فاؤنڈیشن نے پشاور میں ایک علیحدہ پولیس اسٹیشن کے قیام پر زور دیا، تاکہ خواجہ سرا افراد کو تحفظ اور انصاف تک بروقت اور مؤثر رسائی حاصل ہو سکے۔
منزل فاؤنڈیشن نے اس شمولیتی اقدام کو پالیسیوں کے مؤثر نفاذ اور حکومت کی جوابدہی کی طرف ایک اہم قدم قرار دیا۔ ادارے نے محکمہ سماجی بہبود کی جانب سے اسٹیک ہولڈرز کی شمولیت کو سراہا اور امید ظاہر کی کہ یہ سلسلہ حقیقی بہتری کی جانب گامزن رہے گا۔
