رپورٹ:سید عا صم علی قادری(لندن )
فیفا ورلڈ کپ 2026 کا شاندار اختتام ایک یادگار اور سنسنی خیز فائنل پر ہوا، جہاں اسپین نے دفاعی چیمپئن ارجنٹینا کو اضافی وقت میں 1-0 سے شکست دے کر تاریخ میں دوسری مرتبہ عالمی چیمپئن ہونے کا اعزاز حاصل کر لیا۔ مقررہ 90 منٹ تک دونوں ٹیمیں کوئی گول نہ کر سکیں، تاہم اضافی وقت میں اسپین نے فیصلہ کن حملہ کرتے ہوئے فاتحانہ گول اسکور کیا ورلڈ کپ کے فائنل میں دنیا کی دو مضبوط ترین ٹیمیں آمنے سامنے تھیں۔ ایک جانب دفاعی چیمپئن ارجنٹینا اپنے اعزاز کا دفاع کرنا چاہتا تھا
جبکہ دوسری جانب یورپی چیمپئن اسپین مسلسل شاندار کارکردگی کے بعد عالمی تاج اپنے نام کرنے کے لیے پرعزم تھا۔ دونوں ٹیموں نے آغاز ہی سے جارحانہ اور منظم کھیل پیش کیا، لیکن دونوں گول کیپرز اور دفاعی کھلاڑیوں نے بہترین کارکردگی کا مظاہرہ کرتے ہوئے مقررہ وقت تک مقابلہ برابر رکھا۔ ارجنٹینا کے مڈفیلڈر اینزو فرنانڈیز کو دوسرا پیلا کارڈ ملنے پر میدان سے باہر بھیج دیا گیا، جس کے بعد ارجنٹینا کو دس کھلاڑیوں کے ساتھ کھیلنا پڑا۔ اضافی وقت میں فیران ٹوریس نے فیصلہ کن گول کر کے اپنی ٹیم کو ناقابلِ فراموش فتح دلا دی۔ اس کامیابی کے ساتھ اسپین نے 2010 کے بعد دوسری مرتبہ فیفا ورلڈ کپ جیت کر عالمی فٹبال میں اپنی برتری ثابت کر دی۔ پورے ٹورنامنٹ کے دوران اسپین نے نہایت متوازن، منظم اور دفاعی اعتبار سے مضبوط کھیل پیش کیا۔
آسٹریا، پرتگال، بیلجیم اور فرانس جیسی مضبوط ٹیموں کو شکست دینے کے بعد اسپین نے فائنل میں ارجنٹینا کو بھی زیر کر کے ٹرافی اپنے نام کی۔ فتح کے بعد اسپین کے کھلاڑی، کوچنگ اسٹاف اور ہزاروں مداح خوشی سے جھوم اٹھے، جبکہ اسٹیڈیم "ویوا اسپین” کے نعروں سے گونج اٹھا۔
