سعودی عرب، مصر، پاکستان اور ترکیہ نے مشرق وسطیٰ اور خطے میں جاری کشیدگی اور تنازعات کے پائیدار حل کے لیے مذاکرات اور سفارت کاری کی ضرورت پر زور دیا ہے۔
چاروں ممالک کے وزرائے خارجہ نے 21 ستمبر 2026 کو نیویارک میں اقوام متحدہ کی جنرل اسمبلی کے 81ویں اجلاس کے موقع پر مشاورتی اجلاس کیا، جس میں علاقائی اور عالمی صورتحال پر تبادلہ خیال کیا گیا۔
اجلاس کے بعد جاری مشترکہ اعلامیے میں وزرائے خارجہ نے کہا کہ خطے میں امن، سلامتی، استحکام اور خوشحالی کے لیے چاروں ممالک کے درمیان مسلسل مشاورت اور رابطہ ضروری ہے۔ اعلامیے میں جاری کشیدگی اور جنگی کارروائیوں پر گہری تشویش کا اظہار کرتے ہوئے مذاکرات اور سفارت کاری کو پائیدار حل کا راستہ قرار دیا گیا۔
چاروں ممالک نے دیرپا امن اور استحکام کے لیے اسلام آباد مفاہمتی یادداشت پر عملدرآمد کی ضرورت پر بھی زور دیا۔
مشترکہ اعلامیے میں سعودی عرب کے خلاف تمام حملوں، بالخصوص حالیہ حوثی حملوں کی شدید مذمت کی گئی اور سعودی عرب کی خودمختاری، علاقائی سالمیت اور سلامتی کے لیے حمایت کا اعادہ کیا گیا۔ وزرائے خارجہ نے سعودی عرب کے بین الاقوامی قوانین اور اقوام متحدہ کے منشور کے مطابق اپنے دفاع، اپنی سرزمین اور عوام کے تحفظ کے حق کی بھی حمایت کی۔
اعلامیے میں بحری آمدورفت کی سلامتی اور آزادی یقینی بنانے کی اہمیت پر بھی زور دیا گیا۔ چاروں ممالک نے یمن کی جائز حکومت اور صدارتی قیادت کونسل کی حمایت کا اعادہ کرتے ہوئے یمن میں سلامتی، استحکام اور ترقی کے لیے سیاسی عمل اور جامع یمنی مذاکرات کی ضرورت پر زور دیا۔
فلسطین کے معاملے پر سعودی عرب، مصر، پاکستان اور ترکیہ نے فلسطینی عوام کے جائز حقوق، بشمول حق خودارادیت، کی حمایت کا اعادہ کیا۔
چاروں ممالک نے سوڈان کی خودمختاری، وحدت اور آزادی کی حمایت بھی دہرائی اور اس کے جائز قومی اداروں کے تحفظ پر زور دیا۔ اعلامیے میں سوڈان کی خودمختاری اور وحدت کو نقصان پہنچانے والی متوازی حکومتوں یا اداروں کو مسترد کرتے ہوئے ہتھیاروں، کرائے کے جنگجوؤں اور غیر ملکی جنگجوؤں کی غیرقانونی آمد روکنے کی ضرورت پر زور دیا گیا۔
وزرائے خارجہ نے علاقائی اور عالمی پیش رفت پر قریبی رابطے اور مشاورت جاری رکھنے، اجتماعی سلامتی کو مضبوط بنانے اور خطے میں طویل مدتی استحکام کے فروغ پر اتفاق کیا۔
