پاکستان اٹامک انرجی کمیشن (PAEC) فاؤنڈیشن نے چشمہ 5 نیوکلیئر پاور پلانٹ کے اخراجی مقام پر پانچ میگاواٹ کے پن بجلی منصوبے کے قیام کا معاہدہ کرلیا ہے۔
PAEC کے مطابق فاؤنڈیشن ہائیڈل پاور پلانٹ یونٹ 05 (FHPP-05) منصوبہ مکمل ہونے کے بعد سالانہ تقریباً 30.66 ملین کلو واٹ گھنٹے صاف بجلی پیدا کرے گا، جو قومی گرڈ میں شامل کی جائے گی۔
یہ منصوبہ مقام پر دستیاب پن بجلی کی صلاحیت کو بروئے کار لاتے ہوئے پانی کے وسائل کے مؤثر استعمال اور پائیدار بجلی کی پیداوار میں معاونت کرے گا۔ منصوبے سے بجلی کی پیداوار ستمبر 2029 تک شروع ہونے کی توقع ہے۔
PAEC فاؤنڈیشن کمیشن کے ملازمین اور ان کے اہل خانہ کی فلاح و بہبود کے لیے 1994 میں قائم کی گئی غیر منافع بخش تنظیم ہے۔ نئے منصوبے کے بعد فاؤنڈیشن کے قابل تجدید توانائی کے منصوبوں میں مزید اضافہ ہوگا اور قومی گرڈ میں 5 میگاواٹ صاف بجلی شامل ہوگی۔
منصوبے کے معاہدے پر اسلام آباد میں PAEC ہیڈکوارٹرز میں دستخط کیے گئے۔ معاہدے کے فریقین میں PAEC فاؤنڈیشن اور چائنا اوشن انجینئرنگ کنسٹرکشن کارپوریشن لمیٹڈ، ننگبو واٹر کنزروینسی اینڈ ہائیڈرو پاور پلاننگ اینڈ ڈیزائن انسٹی ٹیوٹ کمپنی لمیٹڈ اور حبیب رفیق انجینئرنگ پرائیویٹ لمیٹڈ پر مشتمل مشترکہ منصوبہ شامل ہے۔
PAEC کے چھ جوہری بجلی گھر اس وقت قومی گرڈ کے لیے مجموعی طور پر 3,530 میگاواٹ صاف، پائیدار اور کم لاگت بجلی پیدا کر رہے ہیں۔
چشمہ 5 نیوکلیئر پاور پلانٹ کے حوالے سے رواں ماہ بین الاقوامی جوہری توانائی ایجنسی (IAEA) اور پاکستان کے درمیان حفاظتی معاہدہ بھی طے پایا تھا۔ 1,200 میگاواٹ کے اس منصوبے سے متعلق معاہدے کا مقصد توانائی کے تحفظ کو مضبوط بنانے کے ساتھ جوہری عدم پھیلاؤ کے بین الاقوامی معیار برقرار رکھنا ہے۔
اس سے قبل جون میں واپڈا نے گومل زام ہائیڈرو پاور اسٹیشن کے متاثرہ پیداواری یونٹس آٹھ سال بعد بحال کرکے قومی گرڈ سے منسلک کیے تھے، جس کے بعد اسٹیشن کی مکمل 17.4 میگاواٹ پیداواری صلاحیت بحال ہوگئی تھی۔
مئی میں وزیراعظم شہباز شریف نے مستقبل کی توانائی ضروریات پوری کرنے کے لیے قابل تجدید ذرائع پر مبنی جامع حکمت عملی تشکیل دینے کی ہدایت کی تھی۔ انہوں نے پن بجلی، شمسی توانائی، بائیو گیس اور دیگر قابل تجدید ذرائع سے بجلی کی پیداوار بڑھانے پر زور دیا تھا۔
