چین میں ریسٹورنٹ مالک نے ملازمین کی محنت کے اعتراف میں لاکھوں روپے مالیت کی نئی گاڑیاں تحفے میں دے دیں۔
Website Article:
چین میں ریسٹورنٹ مالک کا ملازمین کو مہنگی گاڑیوں کا تحفہ
چین میں ایک ریسٹورنٹ کی مالک نے بہترین کارکردگی دکھانے والے ملازمین کو نئی گاڑیاں تحفے میں دے کر سب کی توجہ حاصل کرلی۔ ان ملازمین میں ایسے افراد بھی شامل ہیں جو شدید سردی کے باوجود الیکٹرک اسکوٹر پر کام کرنے آتے تھے۔
چینی صوبے ہینان کے شہر جیاوزو میں بیف ہاٹ پاٹ ریسٹورنٹ چین چلانے والی ما یانلی نے اپنے بعض ملازمین کو نئی گاڑیاں فراہم کیں۔ ساؤتھ چائنا مارننگ پوسٹ کے مطابق ہر گاڑی کی قیمت 3 لاکھ یوآن تھی، جو پاکستانی کرنسی میں تقریباً 43 لاکھ روپے بنتی ہے۔
رپورٹ کے مطابق ریسٹورنٹ کی مالک نے گاڑیاں ملازمین کے حوالے کرنے سے تقریباً دو ہفتے پہلے ہی ان کی مکمل ادائیگی کردی تھی۔
تحفے میں گاڑی حاصل کرنے والی ملازمہ لی جی اس غیر متوقع خوشی پر حیران رہ گئیں۔ ان کے مطابق ما یانلی نے شوروم جاتے ہوئے صرف اتنا کہا تھا کہ انہیں ایک بڑا کھلونا ملنے والا ہے، تاہم اسی روز ایک نئی سفید گاڑی ان کے نام پر رجسٹرڈ کردی گئی۔
ملازمین کو گاڑیاں دینے کا خیال کیسے آیا؟
رپورٹ کے مطابق ما یانلی کو ملازمین کے لیے گاڑیاں خریدنے کا خیال گزشتہ موسم سرما میں آیا تھا۔ اس دوران انہوں نے لی جی کو، جو گزشتہ آٹھ برس سے ان کے ریسٹورنٹ میں کام کررہی تھیں، شدید سردی میں اسکوٹر پر کام کے لیے آتے دیکھا۔
سرد موسم کے باعث لی جی کا چہرہ سرخ، کان جامنی اور ہاتھ اکڑے ہوئے تھے۔ ملازمہ کی یہ حالت دیکھ کر ما یانلی نے سوچا کہ جب وہ خود آرام دہ گاڑی میں سفر کرسکتی ہیں تو ان کے ملازمین کو سخت موسمی حالات میں سفر کرنے پر مجبور کیوں ہونا چاہیے۔
اس واقعے کے بعد انہوں نے بہترین کارکردگی دکھانے والے بعض ملازمین کو نئی گاڑیاں دینے کا فیصلہ کیا اور ان کے لیے گاڑیوں کی ادائیگی بھی پہلے ہی مکمل کردی۔
چین میں ملازمین کو بڑے انعام دینے کا رجحان
چین میں کاروباری مالکان کی جانب سے ملازمین کو بھاری مالی انعامات اور قیمتی تحائف دینے کے اقدامات بھی توجہ حاصل کررہے ہیں۔
رپورٹ کے مطابق ہینان کوانگ شان کرین کمپنی کے چیئرمین سوئی پی جون نے 2025ء میں چینی نئے سال کے موقع پر اپنے ملازمین میں مجموعی طور پر 18 کروڑ یوآن کے بونس تقسیم کیے تھے۔
