گورنمنٹ گرلز ڈگری کالج گلشن رحمان کالونی کی نئی پرنسپل نے چارج سنبھال لیا

گورنمنٹ گرلز ڈگری کالج گلشن رحمان کالونی پشاور کی نئی پرنسپل پروفیسر نہایت صافی نے عہدے کا چارج سنبھال لیا۔ اس سے قبل وہ گورنمنٹ گرلز ڈگری کالج زریاب کالونی پشاور میں بطور پرنسپل خدمات انجام دے رہی تھیں جہاں انہوں نے اپنی ذمہ داریاں بھرپور جذبے، محنت اور لگن کے ساتھ نبھائیں۔چارج سنبھالنے پر کالج کے تدریسی و غیر تدریسی عملے نے پروفیسر نہایت صافی کا پرتپاک استقبال کیا اور انہیں نئی ذمہ داری سنبھالنے پر مبارکباد پیش کی۔ اس موقع پر پروفیسر نہایت صافی نے کہا کہ ان کی اولین ترجیح گورنمنٹ گرلز ڈگری کالج گلشن رحمان کالونی کو تعلیمی معیار، نظم و ضبط اور مثبت تعلیمی ماحول کے حوالے سے ایک مثالی ادارہ بنانا ہے۔انہوں نے کہا کہ طالبات کو معیاری تعلیم کی فراہمی وقت کی اہم ضرورت ہے اور معاشرے کی ترقی میں خواتین کی تعلیم بنیادی کردار ادا کرتی ہے۔ انہوں نے اس عزم کا اظہار کیا کہ وہ کالج کے تمام اساتذہ اور عملے کے تعاون سے ادارے کو شہر کے بہترین گرلز کالجوں میں شامل کرنے کے لیے بھرپور کوشش کریں گی۔پروفیسر نہایت صافی نے کہا کہ گورنمنٹ گرلز ڈگری کالج زریاب کالونی میں اپنی ذمہ داریوں کے دوران بھی انہوں نے تعلیم کے معیار، طلبہ کی رہنمائی اور ادارے کی بہتری کے لیے بھرپور جذبے کے ساتھ کام کیا اور اسی جذبے کو نئے ادارے میں بھی جاری رکھا جائے گا۔ انہوں نے کالج کے اساتذہ پر زور دیا کہ وہ طالبات کی تعلیمی و اخلاقی تربیت پر خصوصی توجہ دیں اور ادارے کی بہتری کے لیے اپنا بھرپور کردار ادا کریں۔انہوں نے کہا کہ گلشن رحمان کالونی اور ملحقہ علاقوں میں بچیوں کو اعلی تعلیم کے بہتر مواقع فراہم کرنا معاشرے کی اہم ضرورت ہے، اس لیے کالج کو ایسا مثالی تعلیمی مرکز بنایا جائے گا جہاں طالبات کو معیاری تعلیم کے ساتھ ساتھ اپنی صلاحیتوں کو اجاگر کرنے کے بھرپور مواقع میسر ہوں۔ اس موقع پر کالج کے عملے نے پرنسپل پروفیسر نہایت صافی کو اپنے مکمل تعاون کی یقین دہانی کرائی۔