عالمی شہرت یافتہ سائیکل دوڑ "ٹور ڈی فرانس”سلووینیا کے سائیکلسٹ تاڈی پوگاچار نے جیت لی

رپورٹ :سید عاصم علی قادری (لندن )

113واں ٹور ڈی فرانس 2026دنیا کی سب سے بڑی اور معتبر سائیکل ریسوں میں شمار ہونے والا مقابلہ تھا، جو 4 جولائی سے 26 جولائی 2026 تک اسپین کے شہر بارسلونا سے شروع ہو کر فرانس کے دارالحکومت پیرس میں اختتام پذیر ہوا۔ تقریبا 3,333 کلومیٹر طویل اس ریس میں دنیا کے بہترین پیشہ ور سائیکلسٹوں نے حصہ لیا۔ اس سال کا سب سے بڑا اعزاز سلووینیا کے عالمی شہرت یافتہ سائیکلسٹ تاڈی پوگاچار (Tadej Pogaar) نے حاصل کیا، جنہوں نے مجموعی برتری (Yellow Jersey) برقرار رکھتے ہوئے ٹور ڈی فرانس 2026 اپنے نام کیا۔ یہ ان کے کیریئر کی پانچویں ٹور ڈی فرانس فتح تھی۔ اس کامیابی کے ساتھ وہ سائیکلنگ کی تاریخ کے عظیم ترین سائیکلسٹوں، ایڈی مرکس، برنارڈ ہینالٹ، ژاک آنکیتیل اور میگوئل اندورین کی صف میں شامل ہوگئے، جنہوں نے بھی پانچ پانچ مرتبہ یہ اعزاز جیتا تھا۔
تاڈی پوگاچار 21 ستمبر 1998 کو کومینڈا، سلووینیا میں پیدا ہوئے۔ کم عمری ہی سے انہیں سائیکلنگ کا شوق تھا اور انہوں نے مقامی کلبوں سے اپنے کھیل کا آغاز کیا۔ بعد ازاں وہ پیشہ ور سائیکلنگ میں داخل ہوئے اور جلد ہی دنیا کے بہترین رائیڈرز میں شمار ہونے لگے۔ وہ UAE Team Emirates-XRG کے نمایاں رکن ہیں اور جارحانہ انداز، پہاڑی مراحل میں غیرمعمولی صلاحیت اور ٹائم ٹرائل کی مہارت کے باعث عالمی شہرت رکھتے ہیں۔ مجموعی درجہ بندی میں ریمکو ایونپول دوسرے جبکہ آئزک ڈیل ٹورو تیسرے نمبر پر رہے۔

ٹور ڈی فرانس (Tour de France)دنیا کی سب سے قدیم، مشہور اور مشکل سائیکل ریس ہے۔ اس کا آغاز یکم جولائی 1903 کو فرانس میں ہوا۔ اس ریس کا مقصد فرانسیسی کھیلوں کے اخبار L’Auto کی اشاعت بڑھانا تھا۔ اس کے مدیر ہنری ڈیسگرانژ (Henri Desgrange) اور صحافی ژیو لیفیوغ (Go Lefvre) نے اس مقابلے کا تصور پیش کیا۔پہلی ریس یکم جولائی تا 19 جولائی 1903 منعقد ہوئی۔ اس میں صرف 60 سائیکلسٹ شریک ہوئے اور ریس پیرس سے شروع ہو کر فرانس کے مختلف شہروں سے گزرتے ہوئے دوبارہ پیرس میں اختتام پذیر ہوئی۔ اس کا پہلا فاتح موریس گاراں (Maurice Garin) تھا، جو اطالوی نژاد فرانسیسی سائیکلسٹ تھے ٹور ڈی فرانس دنیا کی امیر ترین سائیکل ریسوں میں سے ایک ہے۔ 2026 میں مجموعی انعامی رقم تقریبا 2.3 ملین یورو رکھی گئی، جبکہ مجموعی فاتح (ییلو جرسی)کو 500,000 یورو انعام دیا گیا۔مسلم ممالک کے سائیکلسٹ ضرور ٹور ڈی فرانس میں شریک ہوئے ہیں اور بعض نے شاندار کامیابیاں بھی حاصل کی ہیں،قازقستان کے سائیکلسٹ متعدد بار ٹور ڈی فرانس میں شریک ہوئے ہیں، جبکہ قازقستان کی آستانہ (Astana) ٹیم نے بھی اس ریس میں نمایاں کامیابیاں حاصل کیں۔الجزائر اور مراکش کے چند سائیکلسٹ مختلف ادوار میں ٹور ڈی فرانس میں شریک ہوئے، تاہم وہ مجموعی چیمپئن یا ٹاپ تھری میں جگہ نہیں بنا سکے۔ تیونس کے علی نفاطی (Ali Neffati) 1913 میں ٹور ڈی فرانس میں حصہ لینے والے پہلے مسلمان اور پہلے تیونسی سائیکلسٹ سمجھے جاتے ہیں۔ اریٹیریا کے بینیام گیرمائے (Biniam Girmay) نے 2024 میں ٹور ڈی فرانس کے کئی مراحل (Stages) جیت کر تاریخ رقم کی اور گرین جرسی (Points Classification) اپنے نام کی۔ وہ ٹور ڈی فرانس میں اس درجے کی کامیابی حاصل کرنے والے پہلے سیاہ فام افریقی سائیکلسٹ بنے،ٹور ڈی فرانس کی عالمی مقبولیت کے باعث بعض سالوں میں ریس کا آغاز یا ابتدائی مراحل دوسرے ممالک سے بھی ہوئے۔ آج اسے Grand Dpart کہا جاتا ہے۔ 2027 میں ٹور ڈی فرانس ایڈنبرا (اسکاٹ لینڈ) سے آغاز ہوگا اور ریس اسکاٹ لینڈ، انگلینڈ اور ویلز سے گزرے گی۔