کالام میں ارلی وارننگ سسٹمز فعال کرنے کا فیصلہ

اسسٹنٹ کمشنر بحرین نے لا انفورسمنٹ اور ویجیلنس کمیٹیوں کو مٹلتان، مانکیال اور گبرال/اتروڑ میں نصب تمام ارلی وارننگ سسٹمز کا تفصیلی معائنہ کرنے کی ہدایت جاری کر دی ہے۔ برسوات انتظامیہ کے مطابق مٹلتان میں نصب ارلی وارننگ سسٹمز کا معائنہ کامیابی کے ساتھ مکمل کر لیا گیا ہے جبکہ مانکیال اور گبرال/اتروڑ میں معائنہ کا عمل جاری ہے۔ کمیٹیاں سسٹمز کی آپریشنل حالت، فعالیت اور ممکنہ ہنگامی صورتحال سے نمٹنے کے لیے ان کی تیاری کا جائزہ لے رہی ہیں تاکہ کسی بھی قدرتی آفت یا ایمرجنسی کی صورت میں بروقت و موثر ردعمل کو یقینی بنایا جا سکے۔ انتظامیہ کے مطابق عوام کے جان و مال کے تحفظ اور پیشگی انتباہی نظام کو فعال رکھنے کیلئے تمام ضروری اقدامات اٹھائے جا رہے ہیں۔