اسلام آباد: وزیراعظم شہباز شریف نے پاکستان تحریک انصاف (پی ٹی آئی) کو مارچ اور دھرنوں کا سلسلہ ختم کرنے کی شرط پر مذاکرات کی باضابطہ دعوت دے دی ہے۔
وفاقی دارالحکومت میں ایک تقریب سے خطاب کرتے ہوئے وزیراعظم شہباز شریف نے واضح کیا کہ حکومت کے دروازے بات چیت کے لیے کھلے ہیں، تاہم مذاکرات کا عمل احتجاجی سیاست کے خاتمے کے بعد ہی ممکن ہو سکے گا۔ انہوں نے افسوس کا اظہار کرتے ہوئے کہا کہ اس سے قبل گفتگو کو کامیاب بنانے کی تمام کوششیں بار آور ثابت نہیں ہو سکیں۔
وزیراعظم نے گفتگو کرتے ہوئے کہا کہ حکومت نے ڈھائی سال کی مسلسل محنت اور بہترین ٹیم ورک سے ملکی معیشت کو استحکام بخشا ہے۔ ان کا کہنا تھا کہ یہ سخت جدوجہد سے حاصل ہونے والا میکرو اکنامک استحکام قومی ترقی اور ملکی وقار کے لیے انتہائی ضروری ہے۔
انہوں نے خبردار کیا کہ مسلسل دھرنوں اور احتجاجی مظاہروں کا براہ راست نقصان معیشت کو پہنچے گا۔ ایک ایسے وقت میں جب ملک ترقی کی سمت گامزن ہے، احتجاجی سیاست کے باعث ملکی برآمدات، درآمدات اور مینوفیکچرنگ کے شعبے شدید متاثر ہونے کا خدشہ ہے۔ وزیراعظم نے سوال اٹھایا کہ معاشی ترقی کی رفتار کو روکنا ملک دشمنی کے مترادف ہے۔ انہوں نے اپوزیشن کو ہوش کے ناخن لینے اور ملک کی بین الاقوامی ساکھ کو نقصان پہنچانے والے اقدامات سے گریز کرنے کا مشورہ دیا۔
