پاکستان تحریک انصاف کے چیئرمین بیرسٹر گوہر خان نے پارلیمنٹ ہاؤس کے باہر ذرائع ابلاغ سے گفتگو کرتے ہوئے بانی پی ٹی آئی عمران خان کی بہنوں اور دیگر گرفتار خواتین کی بلا تاخیر رہائی کا مطالبہ کیا ہے۔ ان کا کہنا تھا کہ غیر سیاسی خواتین کو قید کرنا ہماری مشرقی اور سیاسی روایات کے منافی ہے، اور ایسی کارروائیوں سے ملک میں تلخی اور تناؤ کی فضا میں اضافہ ہو رہا ہے۔
بیرسٹر گوہر نے نورین بی بی کی ناساز طبع پر شدید تشویش کا اظہار کرتے ہوئے انہیں فوری طور پر آزاد کرنے کی اپیل کی۔ انہوں نے مزید کہا کہ سیاسی مقاصد کے لیے لانگ مارچ کرنا آئینی حق ہے اور اسے جرم قرار نہیں دیا جا سکتا۔ پی ٹی آئی چیئرمین نے اس بات پر بھی زور دیا کہ موجودہ سیاسی صورتحال کے پیش نظر پی ٹی آئی کی پارلیمانی پارٹی کو باہم بیٹھ کر سنجیدہ اور مفصل مشاورت کرنے کی ضرورت ہے۔
