پاکستان تحریک انصاف (پی ٹی آئی) کے چیئرمین بیرسٹر گوہر نے خیبرپختونخوا میں گورنر راج اور ایمرجنسی کے نفاذ کے اقدام کو پشاور ہائیکورٹ میں آئینی چیلنج دے دیا ہے۔ یہ درخواست علی زمان ایڈووکیٹ کی وساطت سے عدالت عالیہ میں دائر کی گئی ہے۔
درخواست جمع کروانے کے بعد پشاور ہائیکورٹ کے باہر میڈیا سے گفتگو کرتے ہوئے بیرسٹر گوہر نے بتایا کہ کے پی میں گورنر راج اور ایمرجنسی نافذ کر کے جمہوری طور پر منتخب حکومت کا خاتمہ کیا گیا ہے۔ انہوں نے مؤقف اپنایا کہ جن علاقوں میں ایمرجنسی نافذ کی گئی ہے، وہاں دہشت گردوں کی آڑ میں دیگر عناصر چھپ رہے ہیں۔
چیئرمین پی ٹی آئی نے امید ظاہر کی کہ عدالت عالیہ اس اقدام کو منسوخ کر کے صوبے میں جمہوری حکومت بحال کرے گی۔ انہوں نے مزید کہا کہ عدالت سے اس معاملے کی جلد سماعت کی استدعا کی گئی ہے اور پارٹی آئینی و قانونی دائرے میں رہتے ہوئے اپنی جدوجہد جاری رکھے گی۔
