خیبرپختونخوا کے وزیر برائے معدنیات و معدنی ترقی عارف احمد زئی نے چینی سرمایہ کاروں اور کان کنی کی کمپنیوں کو صوبے کے وسیع معدنی وسائل سے استفادہ کرنے کی دعوت دیتے ہوئے یقین دلایا ہے کہ صوبائی حکومت ان کی سرمایہ کاری اور عملے کے تحفظ کے لیے مکمل سہولتیں اور فول پروف سکیورٹی فراہم کرے گی۔ صوبائی وزیر نے ان خیالات کا اظہار پشاور میں قائم چینی ثقافتی و معلوماتی مرکز چائنہ ونڈو کے دورے کے موقع پر کیا۔ انہوں نے مرکز کی مختلف گیلریوں کا دورہ کیا جبکہ انہیں پاکستان اور چین کے درمیان دوستی کے فروغ، چینی ثقافت کی ترویج اور عوامی سطح پر روابط کو مضبوط بنانے کے لیے چائنہ ونڈو کی سرگرمیوں کے بارے میں تفصیلی بریفنگ دی گئی۔
عارف احمد زئی نے پاکستان اور چین کے عوام کو قریب لانے میں چائنہ ونڈو کے کردار کو سراہتے ہوئے کہا کہ ایسے اقدامات دونوں ممالک کے درمیان آزمودہ دوستی کو مزید مستحکم بنانے میں اہم کردار ادا کر رہے ہیں۔اس موقع پر میڈیا سے گفتگو کرتے ہوئے صوبائی وزیر نے کہا کہ پاکستان اور چین کی دوستی ہر آزمائش پر پوری اتری ہے اور اب یہ تعلق ایک جامع شراکت داری میں تبدیل ہو چکا ہے، جس میں اقتصادی ترقی، بنیادی ڈھانچہ، صنعت، تعلیم، ثقافت اور عوامی روابط سمیت مختلف شعبے شامل ہیں۔ انہوں نے کہا کہ اس شراکت داری کا اگلا اہم مرحلہ خیبرپختونخوا کے اقتصادی شعبوں، خصوصا معدنیات اور کان کنی میں چینی سرمایہ کاری اور شمولیت میں اضافہ ہونا چاہیے۔ عارف احمد زئی نے کہا کہ خیبرپختونخوا قیمتی معدنی وسائل سے مالا مال صوبہ ہے اور یہاں ذمہ دارانہ کان کنی، معدنی پراسیسنگ اور ویلیو ایڈیشن کے وسیع امکانات موجود ہیں۔
انہوں نے زور دیا کہ محض خام معدنیات نکال کر برآمد کرنے کے بجائے جدید ٹیکنالوجی، پراسیسنگ کی سہولتوں اور ایسی صنعتوں کے قیام پر توجہ دی جانی چاہیے جو روزگار کے مواقع پیدا کرنے کے ساتھ ساتھ صوبائی معیشت کو بھی مضبوط کریں ۔صوبائی وزیر نے چینی سرمایہ کاروں، کان کنی کی کمپنیوں اور جدید ٹیکنالوجی فراہم کرنے والے اداروں کو کھلی دعوت دی کہ وہ خیبرپختونخوا کا دورہ کریں، یہاں موجود معدنی وسائل کا جائزہ لیں اور مشترکہ منصوبوں اور طویل المدتی سرمایہ کاری کے امکانات تلاش کریں۔انہوں نے کہا کہ چینی کمپنیوں کو کان کنی اور معدنی پراسیسنگ کے شعبوں میں وسیع تجربہ، جدید ٹیکنالوجی اور مہارت حاصل ہے۔ ہم خیبرپختونخوا میں ان کی سرمایہ کاری کا خیرمقدم کریں گے اور انہیں ہر ممکن سہولت فراہم کی جائے گی۔
عارف احمد زئی نے ممکنہ چینی سرمایہ کاروں کو یقین دلایا کہ صوبائی حکومت غیر ملکی سرمایہ کاروں کے تحفظ کو انتہائی اہمیت دیتی ہے اور صوبے میں منصوبوں پر کام کرنے والے چینی شہریوں اور کمپنیوں کے لیے فول پروف سکیورٹی انتظامات کیے جائیں گے۔انہوں نے کہا کہ معدنیات کی تلاش، جدید کان کنی کے طریقوں اور ویلیو ایڈڈ صنعتوں میں سرمایہ کاری سے ہزاروں افراد کے لیے روزگار کے مواقع پیدا ہو سکتے ہیں، صوبائی محصولات میں اضافہ ہو سکتا ہے اور معدنی وسائل سے مالا مال علاقوں کو اقتصادی سرگرمیوں کے مراکز میں تبدیل کیا جا سکتا ہے۔
صوبائی وزیر نے معدنیات کے شعبے کو پاک چین اقتصادی راہداری کے وسیع تر تعاون سے منسلک کرنے کی ضرورت پر بھی زور دیا۔ انہوں نے کہا کہ خیبرپختونخوا اپنے قدرتی وسائل اور جغرافیائی اہمیت کی وجہ سے پاکستان اور چین کے اقتصادی تعاون کے اگلے مرحلے میں نمایاں کردار ادا کرنے کی مکمل صلاحیت رکھتا ہے۔ چائنہ ونڈو کے دورے کے دوران عارف احمد زئی نے ادارے کی سرگرمیوں کو سراہتے ہوئے کہا کہ چینی ثقافت، زبان اور باہمی افہام و تفہیم کے فروغ کے لیے اس کی کوششوں سے خیبرپختونخوا کے عوام میں پاکستان اور چین کے تعلقات کے بارے میں آگاہی میں اضافہ ہوا ہے۔
انہوں نے کہا کہ اقتصادی تعاون کے ساتھ ساتھ ثقافتی اور عوامی روابط کو مزید مضبوط بنانے سے پاکستان اور چین کے درمیان ہر موسم کی اسٹریٹجک شراکت داری کو مزید پائیدار اور مضبوط بنیادیں فراہم ہوں گی۔
