عمان سے پشاور آئی خاتون ساتھی سمیت لاپتہ، تفتیش معمہ بن گئی

عمان سے پاکستان آنے والی 29 سالہ خاتون صفیہ بنت احمد بن خلیفہ کی ساتھی سمیت پراسرار گمشدگی ایک معمہ بن چکی ہے۔ خاتون کا پاسپورٹ، لیپ ٹاپ اور موبائل فونز تو مل چکے ہیں، لیکن خود صفیہ کہاں ہے؟ اس سوال کا جواب تاحال کوئی نہیں دے سکا۔میڈیارپورٹ کے مطابق صفیہ 19 اپریل کو عمان کے شہر مسقط سے لاہور پہنچیں۔ ان کی منزل پشاور تھی۔ لاہور ایئرپورٹ پر ان کے ہمراہ 22 سالہ نوجوان اونیس بھی موجود تھا۔ دونوں ایئرپورٹ سے باہر نکلے اور پھر یوں غائب ہو گئے جیسے ہوا میں تحلیل ہو گئے ہوں۔پولیس ذرائع کے مطابق گمشدگی کیس کی تحقیقات حیات آباد پشاور کے فیز تھری تک جا پہنچی ہیں۔ یہاں ایک گھر سے صفیہ کا پاسپورٹ، دو موبائل فونز اور ایک لیپ ٹاپ برآمد ہوا۔ اسی مکان سے پانچ مشتبہ افراد کو حراست میں بھی لیا گیا ہے، لیکن صفیہ اور اس کے ساتھی اونیس کا تاحال کچھ پتا نہیں چل سکا۔ملزمان کے وکیل نے نجی ٹی وی سے گفتگو میں کہا کہ یہ چھ لوگ تھے، ان میں سے ایک میرے پاس آیا تھا، میں نے پشاور ہائی کورٹ میں ڈٹینشن فائل کی تو عدالت نے ہدایات دیں کہ تمام چھ افراد غیر قانونی طور پر گرفتار کئے گئے۔پولیس نے مقدمہ اپنی مدعیت میں درج کر رکھا ہے، لیکن تفتیشی عمل سست روی اور غیر واضح سمت کا شکار ہے۔ ابتدائی تفتیش میں یہ بات سامنے آئی ہے کہ عمان سے متعدد بار اونیس کی والدہ مسلم بی بی کے بینک اکائونٹ میں رقم منتقل کی گئی۔صفیہ اور اونیس کی گمشدگی نے کئی سوالات کو جنم دیا ہے۔