مشال یوسفزئی کا انصاف لائر فورم سے کوئی تعلق نہیں ،صدر آئی ایل ایف

انصاف لائر فورم (آئی ایل ایف) کے صدر قاضی انور نے واضح کیا ہے کہ مشال یوسفزئی کا آئی ایل ایف سے کوئی تعلق نہیں،انصاف لائر فورم میں تفرقے کی اجازت کسی صورت نہیں دی جائے گی ۔قاضی انور اپنے ایک بیان میں آڈیو لیک کے معاملے پر ردعمل دیتے ہوئے کہا کہ مشال بار انتخابات کے دوران مختلف کیمپوں میں گئی تھیں تاہم انصاف لائر فورم سے ان کا کوئی باضابطہ رشتہ نہیں ہے۔قاضی انور نے مزید کہا کہ اگر کوئی یہ سمجھتا ہے کہ مشال میرے قریب ہے تو میں واضح کر دوں کہ میرا اس سے کوئی تعلق نہیں۔ ان کا کہنا تھا کہ کچھ لوگ مشال یوسفزئی کو آئی ایل ایف میں تفرقہ ڈالنے کا ذریعہ سمجھتے ہیں لیکن انصاف لائر فورم میں تفرقے کی اجازت کسی صورت نہیں دی جائے گی۔ انہوں نے کہا کہ ان کے دو بیٹے ہیں جن کا بھی آئی ایل ایف سے کوئی تعلق نہیں ہے۔ قاضی انور کے مطابق مشال یوسفزئی کو سنٹرل کوآرڈینیٹر بانی چیئرمین نے مقرر کیا تھا اور یہ فیصلہ ان کا ذاتی تھا۔قاضی انور نے وضاحت کی کہ بطور صدر وہ آئی ایل ایف کی رکنیت معطل کرنے کا اختیار رکھتے ہیں، لیکن پی ٹی آئی کی رکنیت ختم کرنے کا اختیار ان کے پاس نہیں ہے۔