پشاور میں ٹریفک مسائل کے حل کیلئے قلیل و طویل المدتی منصوبوں کی منظوری

وزیراعلیٰ خیبرپختونخوا علی امین گنڈاپور کی زیر صدارت اجلاس میں صوبائی دارالحکومت پشاور میںٹریفک مسائل کے حل کے لیے قلیل و طویل المدتی منصوبوں کی منظوری دے دی گئی ۔
تفصیلات کے مطابق وزیراعلیٰ خیبر پختونخوا علی امین گنڈا پور کی زیر صدارت ضلع پشاور میں ٹریفک مسائل سے متعلق اہم اجلاس منعقد ہوا جس میں پشاورسے تعلق رکھنے والے صوبائی کابینہ اراکین، ممبران قومی و صوبائی اسمبلیز، چیف سیکرٹری، متعلقہ محکموں کے انتظامی سیکرٹریز، بلدیاتی حکومت کے نمائندوں اور دیگر اعلیٰ حکام نے شرکت کی۔
اجلاس میں پشاور کے ٹریفک مسائل پر قائم کمیٹی کی رپورٹ پر تفصیلی غوروخوص کرنے کے بعد شرکاء کو ٹریفک سے متعلق لیگل فریم ورک، پشاور میں ٹریفک مسائل کے محرکات اور مجوزہ ٹریفک پلان پر بریفنگ دی گئی ۔
اجلاس میں ٹریفک مسائل کے مستقل بنیادوں پر حل کے لئے شارٹ ٹرم اور مڈٹرم پلانز کی منظوری دیتے ہوئے فیصلہ کیا گیا کہ شارٹ ٹرم اور مڈ ٹرم پلانز پر عملدرآمد کے بعد لانگ ٹرم پلان ترتیب دے کر اس پر عملدرآمد کیا جائے گا۔
پلانز کے تحت صوبائی دارالحکومت میں ٹریفک کے مسائل کے پائیدار حل کے لئے قلیل المدتی اور طویل المدتی اقدامات تجویز کئے گئے ہیں جس پر عملدرآمد کے لئے تمام متعلقہ محکموں اور اداروں کی ذمہ داریوں کا واضح تعین کیا گیا ہے۔
ذمہ داریوں کو پوری کرنے کے لئے متعلقہ محکموں اور اداروں کے لئے ٹائم لائینز مقررکیا گیا جبکہ پلانز پر عملدرآمد کے کام کی نگرانی کے لئے موثر مانیٹرنگ میکنزم ترتیب دینے کا فیصلہ بھی کیا گیا ۔
اس موقع پر وزیراعلیٰ علی امین گنڈا پور نے متعلقہ حکام کو مجوزہ پلانز پر فی الفور عمل درآمد شروع کرنے کی ہدایت کرتے ہوئے کہا کہ پلانز پر مقررہ ٹائم لائینز کے مطابق عملدرآمد یقینی بنانے کے لئے پیشرفت کا باقاعدگی سے جائزہ لیا جائے گا۔
انہوں نے کہا کہ ٹریفک پلانز کے تحت مجوزہ اقدامات پر ٹائم لائنز کے مطابق عملدرآمد یقینی بنایا جائے، پشاور ہم سب کا شہر اور پورے صوبے کا چہرہ ہے، پشاور کو صحیح معنوں میں صوبے کا ایک خوبصورت چہرہ بنانے کے لئے پلان ترتیب دیا گیا ہے۔
وزیراعلیٰ نے مزید کہا کہ اگلے سالانہ ترقیاتی پروگرام میں پشاور کے لئے ایک خصوصی پیکج شامل کیا جائے گا، منتخب عوامی نمائندے سیاست سے بالاتر ہو کر پشاور کی بہتری و خوبصورتی میں اپنا کردار ادا کریں،ترقیاتی سکیموں کے لیے منتخب عوامی نمائندوں سے مشاورت کی جائے گی۔
اجلاس میں وزیراعلیٰ خیبر پختونخوا نے نئے ٹریفک پلان پر عمل درآمد کے لیے مختلف محکموں اور اداروں کی خالی آسامیوں پر فوری بھرتیوں کی منظوری دیتے ہوئے درکار مشینری اور دیگر آلات کی ترجیحی بنیادوں پر فراہمی کا بھی فیصلہ کیا ۔
اجلاس میں بعض جگہوں پر بی آر ٹی کو توسیع دینے کے علاوہ ضرورت کی بنیاد پر انڈر پاسز اور اور ہیڈ پل تعمیر کرنے کا فیصلہ کرتے ہوئے زیبرا کراسنگ اور اوور ہیڈ پلوں کی تعمیر پر خصوصی توجہ دینے کی ہدایت کی گئی ۔
بریفنگ کے دوران متعلقہ حکام نے بتایا کہ ناردرن بائی پاس کا مسنگ لنک ناصر باغ تک رواں ماہ کے اختتام تک مکمل ہو جائے گاجبکہ ناصر باغ سے تختہ بیگ تک بھی روڈ پر کام تیزرفتاری سے جاری ہے۔
مزید بتایا گیاکہ انڈسٹریل اسٹیٹ حیات آباد کو بھی رنگ روڈ کی طرف الگ روڈ دے رہے ہیں، خیبر پاس اکنامک کوریڈور پر بھی پیش رفت جاری ہے۔
اجلاس سے خطاب کرتے ہوئے وزیراعلیٰ نے ہدایت دی کہ غیر قانونی پارکنگ کے خلاف بھی اقدامات کی ہدایت پارکنگ سے متعلق قواعد و ضوابط کا نفاذ یقینی بنایا جائے، جس پلازے کے نقشے میں پارکنگ شامل تھی اس پر عمل درآمد یقینی بنوائیںاوراس مقصد کے لیے تمام پلازوں کے نقشوں کا ازسر نو جائزہ لیا جائے، قانون پاس ہونے کے بعد اگر کوئی نقشہ بغیر پارکنگ کے پاس کیا گیا ہے تو ذمہ دار کے خلاف کاروائی کی جائے۔
اجلاس میں کسی کے روزگار کو متاثر کئے بغیر ہتھ ریڑھیوں کو اسٹریم لائن کرنے کا فیصلہ کرتے ہوئے شہر کے سروس اور لنک روڈز کو تجاوزات سے پاک کرنے کی ہدایت کی گئی ۔
اجلاس میں بی آر ٹی روٹس پر پبلک سروس گاڑیوں کے داخلے پر مکمل پابندی کا فیصلہ بھی کیا گیا جبکہ وزیراعلیٰ نے ٹریفک چالان کی موجودہ شرح پر نظر ثانی کی ہدایت کرتے ہوئے کہا کہ گاڑیوں کی ویلیو کے حساب سے چالان مقرر کیے جائیں تاکہ غیر قانونی پارکنگ کا راستہ مسدود ہو سکے۔
وزیراعلیٰ کی زیر صدارت اجلاس میں رکشوں کو اسٹریم لائن کرنے کے لیے مخصوض کلر اسکیم متعارف کرانے کی منظوری بھی دی گئی جبکہ ٹیکسی سروس کو ریگولیٹ کرنے اور الیکٹرک بائیکس کی رجسٹریشن کی منظوری وزیر اعلی کی سٹریٹ لائٹس کی تنصیب و مرمت کے لیے ترجیحات کا تعین کرنے کی ہدایت بھی دی گئی ۔
اجلاس میں یوٹرنز کی ریشنلائزیشن ،غیر قانونی پارکنگ اور ڈبہ اسٹیڈذ کے خلاف زیرو ٹالرنس پالیسی اختیار کرنے سمیت سبزی منڈی باچا خان چوک کو شہر سے باہر منتقل کرنے کی منظوری بھی دے دی گئی۔