عمران خان نے کسی کو کوئی ٹاسک نہیں دیا’ بیرسٹر سیف

مشیر اطلاعات و تعلقات عامہ خیبرپختونخوا بیرسٹر ڈاکٹر سیف نے بانی پی ٹی آئی سے ملاقات کے حوالے کہا ہے کہ عمران خان نے اسٹیبلشمنٹ سے مذاکرات کے حوالے سے کسی کو بھی ٹاسک نہیں دیا، جبکہ میڈیا ذرائع کے نام پر اسٹیبلشمنٹ سے مذاکرات شروع کرنے کی خبریں چلا رہی ہیں۔انہوں نے کہا کہ عمران خان نے اسٹیبلشمنٹ سے مذاکرات کے حوالے سے کسی کو بھی ٹاسک نہیں دیا، جبکہ میڈیا بغیر تصدیق کے ذرائع سے خبریں نشر کرنے سے گریز کرے، ملاقات میں حکومتی معاملات، دہشت گردی اور افغانستان کے امور پر تبادلہ خیال ہوا۔بیرسٹر ڈاکٹر سیف کا کہنا تھا کہ عمران خان نے وزیراعلی کو حکومتی معاملات، جبکہ مجھے دہشت گردی اور افغانستان کے مسئلے سے متعلق ہدایات دیں، ملاقات میں بانی چیئرمین نے واضح طور پر کہا کہ وہ اپنی رہائی اور ذاتی فائدے کے لیے اسٹیبلشمنٹ سمیت کسی سے بات چیت نہیں کریں گے۔ان کا کہنا تھا کہ عمران خان نے کہا ہے کہ ملک کی معاشی ترقی اور سیاسی استحکام میرے لیے سب سے مقدم ہے، تاہم معاشی ترقی سیاسی استحکام کے بغیر ممکن نہیں، عمران خان نے یہ بھی ملاقات میں کہا کہ سیاسی استحکام کے لیے پی ٹی آئی کو تسلیم کرنا ہوگا اور اسے دیوار سے لگانے کی کوشش بند کرنا ہوگی۔صوبائی مشیر اطلاعات کا کہنا تھا کہ سابق وزیراعظم اور بانی پی ٹی آئی عمران خان نے کہا کہ پی ٹی آئی ایک حقیقت ہے اور اسے تسلیم کرنا ہوگا، اس کے بغیر مسائل کا حل ناممکن ہے۔