کاٹلنگ واقعہ کی تمام پہلوؤں سے انکوائری کی جائے گی ، علی امین گنڈاپور

ضلع مردان کے پہاڑی علاقے کاٹلنگ میں دہشت گردوں کے خلاف کارروائی کے دوران عام شہریوں کی شہادتوں کے حوالے سے وزیراعلیٰ خیبر پختونخوا علی امین گنڈاپور نے کہا ہے کہ حقائق سامنے لانے کیلئے کاٹلنگ واقعہ کی تمام پہلوؤں سے انکوائری کی جائے گی .
وزیراعلیٰ خیبرپختونخوا نے کہا کہ انکوائری رپورٹ آنے کے بعد صوبائی حکومت واقعے سے متعلق اپنا واضح موقف دے گی، عام شہریوں کی شہادتوں کا واقعہ قابل مذمت اور افسوسناک ہے، اسی علاقے میں پہلے بھی دہشت گردوں کے خلاف کارروائیوں میں بڑے دہشت گردوں مارے گئے ہیں۔
علی امین گنڈاپور نے کہا کہ سرکاری اطلاعات کے مطابق ہفتے کی صبح اسی علاقے میں دہشت گردوں کے خلاف کارروائی کے دوران 12 دہشت گردوں کو ہلاک کیا گیا، صوبائی حکومت جاں بحق افراد کے لواحقین کے غم میں برابر کی شریک ہے اور ان کے ساتھ دلی ہمدردی اور تعزیت کا اظہار کرتی ہے.
انہوں نے کہا کہ صوبائی حکومت جاں بحق افراد کے لواحقین کو تنہا نہیں چھوڑے گی اور ان کی ہر ممکن معاونت کی جائے گی، جبکہ صوبائی حکومت اور صوبے کے عوام صوبے سے دہشت گردوں کے خاتمے کے لیے پر عزم ہیں۔ یاد رہے کہ وزیراعلیٰ خیبر پختونخوا علی امین گنڈاپور نے کہا ہے کہ حقائق سامنے لانے کیلئے کاٹلنگ واقعہ کی تمام پہلوؤں سے انکوائری کی جائے گی .