امریکی طبی ادارے فوڈ اینڈ ڈرگ ایڈمنسٹریشن (ایف ڈی اے) نے حال ہی میں چائے کو ایک صحت بخش غذا کے طور پر تسلیم کرلیا ہے۔
رپورٹس کے مطابق یہ تاریخی فیصلہ عالمی سطح پر چائے کی صنعت کے دعووں کی تصدیق کرتا ہے کہ چائے صحت سے متعلق فوائد فراہم کرتی ہے۔
فیصلے میں خاص طور پر کہا گیا ہے کہ Camellia sinensis نامی پودے سے حاصل ہونے والی چائے ایک صحت بخش مشروب ہے۔ چائے کی پیداوار اور عالمی سطح پر اس کی مارکیٹنگ کرنے والے کئی اداروں نے اس فیصلے کا خیرمقدم کیا ہے۔
امریکا کی ٹی ایسوسی ایشن کے صدر پیٹر ایف گوگی نے اس فیصلے کو عالمی چائے کی صنعت کے لیے ایک "شاندار خبر” قرار دیا جو کہ چائے کو بطور صحت بخش مشروب کے طور پر فروغ دے گا۔ مزید برآں اس سے مارکیٹ پر بھی مثبت اثر پڑے گا۔
اسی طرح نارتھ ایسٹرن ٹی ایسوسی ایشن(این ای ٹی اے) کے مشیر اور ٹی بورڈ آف انڈیا کے سابق وائس چیئرمین، بدیانند بورکاکوٹی نے یہ کہہ کر اپنے جوش و خروش کا اظہار کیا کہ ہمیں ایف ڈی اے کے فیصلے پر بہت خوشی ہے۔ دنیا بھر میں ہونے والی تحقیق چائے کے صحت سے متعلق فوائد کی نشاندہی کرتی ہے۔ ہم بھارتی حکومت پر زور دیتے ہیں کہ وہ چائے کو صحت مند مشروب کے طور پر فروغ دے۔
