تحریر: ـ اکرام اللہ بنگش
دنیا بھر میں ماحولیاتی آلودگی ایک ایسے سنگین مسئلے کی صورت اختیار کر چکی ہے جس کے اثرات اب صرف قدرتی ماحول تک محدود نہیں رہے بلکہ انسانی صحت، معیشت، سماجی زندگی اور مستقبل کی نسلوں تک پھیل چکے ہیں۔ افسوسناک امر یہ ہے کہ جس ماحول نے انسان کو زندگی بخشی، آج وہی ماحول انسان کے ہاتھوں شدید خطرات سے دوچار ہے۔ صنعتی ترقی، تیز رفتار شہری پھیلاؤ اور قدرتی وسائل کے بے دریغ استعمال نے زمین کے قدرتی توازن کو بُری طرح متاثر کر دیا ہے۔
ماحولیاتی آلودگی سے مراد وہ منفی تبدیلیاں ہیں جو انسانی سرگرمیوں کے نتیجے میں فضا، پانی، زمین اور قدرتی نظام میں پیدا ہوتی ہیں۔ یہ آلودگی مختلف شکلوں میں ہمارے اردگرد موجود ہے، جن میں فضائی، آبی، زمینی اور صوتی آلودگی نمایاں ہیں۔ بظاہر یہ مسائل معمولی نظر آتے ہیں مگر درحقیقت ان کے اثرات نہایت گہرے اور دیرپا ہیں۔
فضائی آلودگی آج بڑے شہروں کا سب سے بڑا مسئلہ بن چکی ہے۔ کارخانوں کا دھواں، موٹر گاڑیوں کے اخراجی دھوئیں، اینٹوں کے بھٹے اور کچرا جلانے کے باعث فضا میں زہریلی گیسوں کی مقدار خطرناک حد تک بڑھ چکی ہے۔ اس کے نتیجے میں سانس، دل اور پھیپھڑوں کی بیماریاں عام ہو رہی ہیں جبکہ بچے اور بزرگ سب سے زیادہ متاثر ہو رہے ہیں۔ کئی شہروں میں اسموگ ایک معمول بن چکا ہے جو نہ صرف روزمرہ زندگی کو متاثر کرتا ہے بلکہ حادثات کا سبب بھی بنتا ہے۔
آبی آلودگی بھی ایک تشویشناک صورت اختیار کر چکی ہے۔ صنعتی فضلہ، گھریلو گندا پانی، زرعی کیمیکلز اور پلاسٹک کا بے تحاشا استعمال دریاؤں، نہروں اور زیرِ زمین پانی کو آلودہ کر رہا ہے۔ صاف پانی کی قلت کے باعث مختلف بیماریاں جنم لے رہی ہیں جبکہ آبی حیات کو بھی شدید نقصان پہنچ رہا ہے۔ ماہرین کے مطابق اگر پانی کے تحفظ کے لیے فوری اقدامات نہ کیے گئے تو آنے والے برسوں میں پانی ایک نایاب شے بن سکتا ہے۔
زمینی آلودگی کا مسئلہ بھی کم خطرناک نہیں۔ پلاسٹک بیگز، اسپتالوں کا خطرناک فضلہ، صنعتی کچرا اور کیمیائی کھادیں زمین کی زرخیزی کو ختم کر رہی ہیں۔ اس آلودہ زمین سے پیدا ہونے والی فصلیں انسانی صحت کے لیے نقصان دہ ثابت ہو رہی ہیں۔ یوں یہ مسئلہ بالواسطہ طور پر ہماری خوراک اور صحت کو متاثر کر رہا ہے۔
صوتی آلودگی کو عموماً نظرانداز کر دیا جاتا ہے، حالانکہ یہ انسانی ذہنی صحت کے لیے نہایت نقصان دہ ہے۔ ٹریفک کا شور، غیر ضروری ہارن، لاؤڈ اسپیکرز اور صنعتی مشینوں کی آوازیں ذہنی دباؤ، بے خوابی اور اعصابی امراض کا باعث بن رہی ہیں۔ ایک پُرسکون ماحول اب شہروں میں خواب بنتا جا رہا ہے۔
ماحولیاتی آلودگی کی بنیادی وجہ انسانی لاپرواہی اور غیر ذمہ دارانہ رویہ ہے۔ ہم ترقی کے نام پر فطرت کا استحصال کر رہے ہیں مگر اس کے نتائج پر غور نہیں کر رہے۔ جنگلات کی کٹائی، درختوں کی کمی اور ماحولیاتی قوانین پر عملدرآمد کا فقدان اس مسئلے کو مزید گھمبیر بنا رہا ہے۔
اس سنگین صورتحال سے نمٹنے کے لیے حکومت، اداروں اور عوام سب کو مشترکہ کردار ادا کرنا ہوگا۔ درخت لگانا، پلاسٹک کے استعمال میں کمی، قابلِ تجدید توانائی کے ذرائع کو فروغ دینا، کچرے کی مناسب تلفی اور ماحولیاتی قوانین کا سختی سے نفاذ وقت کی اہم ضرورت ہے۔ ساتھ ہی عوام میں شعور بیدار کرنا بھی ناگزیر ہے تاکہ ہر فرد اپنی ذمہ داری کو سمجھے۔
