کراچی میں امتحانی مراکز میں کھلے عام نقل کا سلسلہ عروج پر ہے، کہیں امتحانات کے دوران طلبہ موبائل فون کی مدد نقل کرتے پکڑے جاتے ہیں تو کہیں امتحانات سے قبل پرچہ ہی آؤٹ ہو جاتا ہے۔
ایسا ہی نقل کا ایک واقعہ اورنگی ٹاؤن کراچی کے امتحانی مرکز میں پیش آیا، واقعہ کی ویڈیو سوشل میڈیا پر وائرل ہو گئی جس میں سابق ایم پی اے صداقت حسین کو اسکول میں اساتذہ سے لڑتے دیکھا جا سکتا ہے۔ وہاں پر موجود ایک شخص کہتا ہے کہ ’صداقت بھائی ہم ایم کیو ایم کی نمائندگی کر رہے ہیں، انیس قائمخانی بھائی سے بات کریں گے‘۔
واقعہ کے بارے میں مبینہ طور پر کہا جا رہا ہے کہ سابق ایم پی اے نے امتحانی مرکز میں نقل کرانے کی کوشش کی اور ناکامی پر مشتعل ہوگئے، جس کے بعد انھوں نے خاتون ٹیچر پر تشدد کیا۔ صارفین کی جانب سے سابق ایم پی اے کی حرکت پر شدید ردعمل دیکھنے کو مل رہا ہے۔
