اقبال عارف
فیفا ورلڈ کپ 2026ء کوالیفائر رائونڈ 2 میں سعودی عرب نے پاکستان کو 0۔4 گول سے شکست دے دی، جمعرات کی شب الفتح اسٹیڈیم پر کھیلا جانے والا گروپ جی کا پہلا میچ پاکستان فٹبال ٹیم کے لیے تاریخی حیثیت کا حامل رہا، پاکستان نے پہلی مرتبہ فیفا عالمی کپ کوالیفائرز کا دوسرا رائونڈ کھیلا،میچ کے آغاز سے قبل شروع ہو جانے والی بارش نے قومی ٹیم کے ارمانوں پر پانی پھیر دیا، میچ میں پاکستان ٹیم نے مضبوط حریف ٹیم کے خلاف قدرے بہتر کھیل کا مظاہرہ کیا، تاہم جلد بازی کے سبب گول کرنے کے کئی مواقع ضائع کر دیئے گئے ،میچ کے پہلے ہاف کے اختتام پرفاتح ٹیم کو 0-1 کی برتری حاصل تھی،
سعودی عرب کی جانب سے پہلا اور دوسرا گول صالح الشھری نے 6 ویں اور 48 ویں منٹ میں کیا،تیسرا گول عبدالرحمان غریب نے 91ویں منٹ میں کیا،چوتھا گول عبداللہ ردیف نے 96 ویں منٹ میں اسکور کیا،فیفا کی عالمی رینکنگ میں پاکستان کا 193 واں نمبر ہے جبکہ سعودی عرب 57ویں پوزیشن پر براجمان ہے،پاکستان اپنا اگلا میچ21 نومبر کو اسلام آباد کے جناح سٹیڈیم میں تاجکستان کی ٹیم کے خلاف کھیلے گا،پاکستان نے کمبوڈیا کو شکست دے کر پہلی مرتبہ عالمی کپ کوالیفائر کے دوسرے مرحلے میں جگہ بنائی تھی
