حارث کی عمدہ بیٹنگ’ زلمی نے یونائیٹڈ کو 13رنز سے شکست دیدی

راولپنڈی (محمد سلیمان خان + سحرش بتول ) پاکستان سپر لیگ (پی ایس ایل)کے آٹھویں ایڈیشن کے میچ میں پشاور زلمی نے حارث اور بالرز کی عمدہ کارکردگی کی بدولت اسلام آباد یونائیٹڈ کو 13 رنز سے شکست دیدی۔راولپنڈی کرکٹ اسٹیڈیم میں کھیلے گئے میچ میں اسلام آباد یونائیٹڈ کے کپتان شاداب خان نے ٹاس جیت کر پشاور زلمی کو پہلے بیٹنگ کی دعوت دی۔اسلام آباد یونائیٹد کے خلاف پشاور زلمی نے حارث کی 79 رنز کی عمدہ اننگز کی بدولت 8 وکٹوں پر 179 رنز بنائے۔زلمی کی اننگز کا آغاز کچھ اچھا نہ تھا اور گزشتہ تینوں میچوں میں نصف سنچریاں بنانے والے نوجوان بلے باز صائم ایوب پہلے ہی اوور میں بغیر کوئی رن بنائے پویلین لوٹ گئے۔اس مرحلے پر محمد حارث کا ساتھ دینے بابر اعظم کی جگہ کھیلنے والے بھنوکا راجاپکسے آئے اور دونوں نے ذمے دارانہ کھیل پیش کرتے ہوئے دوسری وکٹ کے لیے 58 گیندوں پر 115 رنز کی ساجھے داری بنائی۔اس مرحلے پر کپتان شاداب خان نے اپنی ٹیم کو کامیابی دلاتے ہوئے راجاپکسے کی 41 رنز کی اننگز کا خاتمہ کردیا۔قائمقام کپتان ٹام کوہلر کیڈمور بھی صرف 12 رنز بنا سکے جبکہ محمد حارث کی 39 گیندوں پر 5 چھکوں اور 7 چوکوں سے لیس 79 رنز کی اننگز بھی اختتام کو پہنچی۔جب 13ویں اوور کی تیسری گیند پر حارث آٹ ہوئے تو زلمی نے 4 وکٹوں پر 118 رنز بنائے تھے اور ایسا محسوس ہوتا تھا کہ ایک مرتبہ پھر شائقین کو 200 رنز سے زائد کا مجموعہ بورڈ پر سجا نظر آئے گا، لیکن مسلسل گرتی ہوئی وکٹوں کے سبب پشاور زلمی درکار رن ریٹ برقرار نہ رکھ سکے۔آخری 45 گیندوں پر پشاور زلمی کے بلے باز صرف 41 رنز بنا سکے اور مقررہ 20 اوورز میں ٹیم 8 وکٹوں کے نقصان پر صرف 179 رنز بنا سکی۔پشاور زلمی کی جانب سے حسن علی نے تین جبکہ شاداب نے دو وکٹیں حاصل کیں